Lenkawl

Zirlaite Scholarship 2nd Instalment pekchhuah har vanga lungawi lohna lantir nan leh Scholarship sum pekchhuah vat phuta Mizo Zirlai Pawl (MZP) ten lungawi lohna an lantir mek chu Election Commission of India in Scholarship sem phalna a pek tak avangin nizan dar 8:30 khan lungawi lohna an lantir mek chu tihtawp a ni. 

Mizoram Assembly Inthlanpui neiha Serchhip District chhung Assembly Bial pathum-a Vote tla te chhiar tura inbuatsaihna atan nimin khan Addl. DC Lalnundika hovin sawrkar mi pawimawhte an thukhawm.

Nimin November 16, 2023 kha India ram chhunga chanchinbu mite ni, ‘National Press Day’ a ni a, ramchhung hmun hrang hrangah he ni pual hian hun hman niin Serchhip-ah pawh MJA Serchhip District chuan he ni pual hian infuihtharna hun an hmang.

Aizawl Dawrpui Vengthar Local Council-a General Seat pakhat (1) ruak hnawhkhat turin by-election neih a ni dawn a, he inthlanna a hman tur Electoral Roll ennawn hna chu nimin khan thawh tan niin nimin khan Draft Electoral Roll chu tar-chhuah a ni a, hming thun thar, siamthat leh paih ngai te siamthat a nih hnuah thla thar December 12-ah Final Electoral Roll tarchhuah a ni ang. Dawrpui Vengthar Local Council Draft Electoral Rolls-ah hian Vote nei mipa 1365 leh hmei-chhia 1662, an vaiin 3027 an awm a, inthlanna neih hun tur chu State Election Commission in a la ruat dawn a ni.

Tlabung-a hnamdang dawrkaite inzawm-khawmna, Non-Tribal Permanent Traders Association chuan Krismas vuakveta khawlai dung a eng chhit mawi tur thahnem tak chu nimin khan Tlabung Branch YMA hnuaia Vanapa Section kutah an hlan a, heng an thil hlan hi cheng sing thum man vel a ni. Tlabung-a Non-Tribal Permanent Traders Association (NPTA) hian hnambil thliar loin tum engemaw zat khawtlang tan an lo luangchhuak tawh thin a, tun tumah hian Tlabung mipuiten thlamuang leh hlim taka Krismas an lawm theih nan hetiang thilpek hi hlan an nih thu an sawi a ni.

Thingsulthliah PHC chuan niminpiah khan India rama damdawi In tha zual leh damlote tana him tehnaah thlanchhuah, 'NQAS National Level Certified' an nih lawmna hun Hospital Area YMA Hall-ah an nei. Tehna hrang hrang hmanga damdawi In tha ni tura intihsiakna NQAS (National Quality Assurance Standard) chuan Thingsulthliah PHC hi a teh hnuah August ni 20, 2023 khan result tichhuakin National Certified an nih thu puan a ni a. Mizoram-a PHC zingah NQAS National Level Certified hmasa ber niin Thingsulthliah PHC rual hian Aibawk PHC-te pawh National Level-ah NQAS certified an ni bawk. NQAS Certificate lawmna hun hi H&FW Principal Director Dr. Vanlalsawma chuan a hmanpui a ni.

KVK Khawzawl-a thawktute chuan nimin khan Rabung khua-a Tomato chingtu chhungkua 30 te nen Phunchawng, Kangfim leh Khumzawl Zau-ah Field Day an hmang a, he hunah hian KVK-a mithiam ten Tomato chingtute tana hriat tur pawimawh hrang hrang an zirtir a ni. Rabung khuaah hian kum 2021 atangin Tomato an lo ching tawh a, KVK-a thawktute hian zirtirna pe thinin, Tomato chi, Arka Abhed leh Arka Samrat chu KVK Khawzawl te hian IIHR-NEH Scheme hnuai atangin an pe a. Rabung khua hian Tomato hi an seng mek a, quintal 500 seng tawhin tunah hian seng mek zel a ni. KVK hian kum 2015 khan Tuipui khua-ah Fur laia Tomato chin hi bul an lo tan tawh a, Khawzawl District chhunga khaw hrang hrang- Tualte, Chawngtlai, Neihdawn leh Khawhai-ah te zirtirna pein Tomato hi an ching chho tan a, Tomato chin kawnga harsatna an tawh leh mamawh ang zelin zirtirna an pe thin a ni.

Nimin khan School of Nursing, Civil Hospital Aizawl chuan Civil Hospital Aizawl Conference Hall-ah ‘Inhmuhkhawm Runpui’ an nei a, he hun hi Alumni Committee Vice President PC. Chuaudingliani'n a kaihruai a, Nursing Deputy Director (Rtd) Thandingliani chu khuallian niin, Nursing Deputy Director (Rtd) Rothangpuii Sailo chu khual zahawm a ni bawk a, Principal Nursing Officer (Rtd.) Lalthari Ralte chuan School of Nursing din chhoh dan kim report pein a tarlang bawk a ni.

Aizawl Two Wheeler Taxi Association (ATTA) chuan Two Wheeler Taxi hmangtu ten thil an theihnghilh leh mi tha lo an tawn palha hnu chhui a awlsam zawk nan Two Wheeler Taxi khalhtute helmet hnung lamah ID number an tar tawh dawn tih thuchhuah siamin an tarlang a. Hei hi Mizoram State Transport Authority (STA) phalnaa ti an nih thu pawh tarlangin, mipuite chu an Two Wheeler Taxi hmanah he number hi lo chhinchhiah thin turin an ngen a. ATTA Member-te Bio Data chu ATTA Office lama an neih vek avangin, hetiang thil a lo thlen palh pawhin passenger-te'n rider number hi an chhinchhiah tawh chuan awlsam takin an inchhui chhuak zung zung thei dawn tih an tarlang bawk.

Chin National Defence Force (CNDF)-te’n niminpiah zing dar 4:00 vela Tuibual khua a Myanmar Sipai Camp an lak hnu a Mizoram lam rawn pan Myanmar sipai 29-te chuan nimin chawhnu dar 2:18 khan Mizoram chhunga Saikhumphai an rawn thleng.