Nimin khan Serchhip leh khawpui thenkhat ah National Press Day 2023 hman a ni
MJA Serchhip District hian nimin chawhnu dar 1:00 khan Serchhip Press Club-ah ‘National Press Day’ pual hian General Body Meeting neiin he hunah hian MJA Serchhip District President C. Lalhminghlua chuan fuihna thu sawiin, thuthar thehdarhna kawnga hna an thawhna ah MJA Member te chu a thara an rilru pe turin a sawm a. Chanchinbu mi pangngai te chu an rintlak tih sawiin, khawtlang leh ram tana Media mi te tangkaina te a sawi a. Tunlai khawvel ah Media chi hrang hrang kan hman tawh thu leh Social Media kan hman nasat tawh avangin mitin te Media lamah kan in hman tawh thu a sawi a, chutih lai chuan sawrkar in a hriatpui Media mi an nihna hre reng tur leh an zahawmna te humhimtu ni zel turin a chah bawk.
MJA President chuan Mizoram-ah sumdawnna atanga thlir chuan Media hna chu eizawnna tlak a ni lo tih sawiin, mahse ram leh khawtlang rawngbawlna a ni tih hre reng turin a chah a, mipui rilru a chhe zawng leh a tha zawnga kaihruai theitu an nihna ah a tha zawnga kaihruaitu ni turin a chah a. Inthlanpui neih takah Media mi te zingah mawi lo taka che leh midangte mit ti kham zawnga khawsa an awm lo chu lawmawm a tih thu a sawi bawk. Hei bakah hian MJA Member te chu mipui leh sawrkar inkara Palai hna thawktu, mipuite tana ding an ni tih hre reng turin a chah bawk a, sawrkar in accreditation a pek chhan te hre reng tura chahin a fuih bawk a ni.
National Press Day pual hian Aizawl-ah chuan I&PR Auditorium-ah inkhawm buatsaih a ni a, he hun hmanpuitu I&PR Addl. Secretary V. Ruatsanga leh MJA General Hqrs. President C. Lalrambuatsaiha ten thuthar thehdarhtute tana hriat tur leh zawm tur pawimawh hrang hrangte an sawi bakah thawhhona leh inpumkhatna tha awm zel se an duh thu an sawi a. Ethical Journalism, hnam leh hnam innghirnghona awm lova, mipui tana thleibik nei lo leh thudik bengvarthlak chauh chhuah thin turin kalkawmte chu an chah a. Democracy ramah Media te chu Fourth Estate/Pillar an nih ang ngeiin kumin election nei zawh takah pawh khan mipuite hriat tur zirtirna leh puanchhuah kawngah an thawhhlawk hle tih an sawi bawk.
Champhai-ah chuan National Press Day pual hian I&PR Conference Hall-ah hun hman niin Champhai DIPRO C. Lalremruati chuan Media leh Technology te chu thil kalkawp tlat an nih thu a sawi a, Media thawktu kalkhawmte chu technology lama thil thar awmte lo inzir thuai thin tur leh an hnathawhna ah te tangkai taka hmang thin turin a chah a. He hunah hian Vanlalruata Hnamte chu Resource Person-ah hmangin he ni thupui zirhona neih a ni.
Kolasib District MJA te pawhin National Press Day pual hian Kolasib Press Club-ah hun hmangin Kolasib DIPRO C. Lalhruaitluanga chuan kumin a he ni thupui, ‘Media in an Era of Artificial Intelligence’ tih hmangin thu a sawi a. Artificial Intelligence (AI) lo than chhoh zel dan tarlangin, tunlai khawvelah khawlin mihringte min thunun tawh zawk a, he hun (era)-a Media-te kal zel dan tur leh hmasawn zel dan tur kan ngaihtuah a ngai a ni, tiin sawihona hun an hmang nghal bawk a ni.
National Press Day hi November ni 16, 1966-a din, ram pum huapa Media-te thlung khawmtu Press Council of India (PCI) din ni pualin kumtin hman thin a ni a. Press mite zalenna, hamthatna, mawhphurhna leh hma-sawna tur leh ram rawngbawlna kawnga Media-te'n hlawk zawka tha an thawh theih dan thupui hrang hrang neiin hman thin a ni a. Kumin hian ‘Media in an Era of Artificial Intelligence’ tih chu thupui-ah hman a ni.
Comments
Post a Comment