Inhumhimna beiseia Mizoram rawn pan Myanmar Sipai ten Mizoram an rawn thleng

Chin National Defence Force (CNDF)-te’n niminpiah zing dar 4:00 vela Tuibual khua a Myanmar Sipai Camp an lak hnu a Mizoram lam rawn pan Myanmar sipai 29-te chuan nimin chawhnu dar 2:18 khan Mizoram chhunga Saikhumphai an rawn thleng.

Tuipuiral YMA Group President T. Lalramenga sawi danin Myanmar sipaite hi Champhai SDPO leh a hote, Dungtlang Police Station amite leh Assam Rifles bakah Vaphai VC-te leh YMA hruaitute’n ni khat leh zan khat zet an lo nghah hnuah an lo dawngsawng a. Myanmar Sipai Major hruai Myanmar sipaite hi an rawn thlen har chhan chu kawng an bo ni a an hriat thu a sawi a. Police lamin an tihtur ang te an tihfel hnuah Major hova kal Assam Rifles te chuan Myanmar sipaite silai leh ralthuam dang rawn kente chu an lo chhawk sak nghal a. Assam Rifles te hian an hmun lamah an hruai a, an hriatpui zui tawh loh thu YMA hruaitu chuan a sawi.

Hetihlai hian CNDF Political Wing, Chin National Organisation (CNO) General Secretary Thawng Thawng chuan Mizoram lama an kal avang leh Mizoram Police-te ngenna zahin Myanmar sipai ho hi an kap zui lo niin a sawi a. Tuibual Myanmar sipai Camp beihna-ah hian sipai thi zat an hriat loh thu a sawi a. Anni lamah Bomb siper vanga hliam na vak lo tuar mi pahnih an awm thu leh Zokhawthar lamah an inenkawl hnuah an kir leh tawh thu a sawi a. CNDF dangte pawh an Camp lama an kir leh vek thu a sawi bawk.

He inkahna avang hian Myanmar ramchhunga Tuibual bul, Leilet khaw mipuite pawh sahimna zawngin chhungkaw 63-ah mi 600 vel chu Vaphai Saikhumphai-ah an lut a. Tuipuiral YMA Group President T. Lalramenga chuan tun dinhmunah chuan raltlan hi 50 leh 100 inkar bawr vel bak an awm tawh lo niin a sawi a. Myanmar sawrkarin indo thlawhna hmanga a rawn beih a rinawm tawh bawk loh avangin an khua chu a ralmuang tawha ringin an let leh niin a sawi bawk.

Comments

Popular News (Last 30 Days)

Vawiin-ah HSSLC Exam result