ECI in Scholarship sem phalna a pek hnuah MZP ten lungawi lohna an lantir an titawp
Nizan a thuchhuah an siamah MZP General Hqrs. chuan Scholarship 2nd Instalment pekchhuah phuta lungawi lohna an lantir leh nizan atanga chawnghei-a lungawi lohna an lantir chu thuneitute atanga thu lawmawm an dawn avangin nizan dar 8:30 khan an titawp tih an tarlang a. Scholarship pekchhuah a nih neih nana MZP hmalakna thlawp tlattu Zirlai Pawl hrang hrangte leh lungawi lohna lantirnaa thawkchhuak zirlai zawng zawngte chungah lawmthu sawiin, “Zirlaite'n kan dikna chanvo kan nawrchhuahna atana tha leh zung thawhtute hi MZP chuan a ngaihlu tak zet a ni,” an ti a. Zirlaite Scholarship sem a nih theih nana MZP hmalakna theihtawp chhuahpuitu, Mizoram Chief Minister Zoramthanga leh Law Minister TJ. Lalnuntluanga te chungah pawh lawmthu sawiin, MZP hmalakna avanga harsat leh buaina thlêng zawng zawngah mipuite hriatthiamna an ngen nghal bawk.
MZP huaihawt hian nimin khan a ni thumna atan Aizawl-a Mizoram Scholarship Board Office kawtah zirlaite hi an pungkhawm leh a, MZP hruaitute hian Chief Minister Zoramthanga chu a Pisa-ah hmuin Chief Minister chuan Election neih zawh tawh a nih avangin Party advantage awm thei thil a ni tawh lova, sem thuai nise a duh thu lo sawiin, Zirlaite Scholarship pe thuai turin Higher & Technical Education Department hotute leh Mizoram Scholarship Board hotute a hrilh nghal tih MZP chuan an sawi a. Nimin vek khan Higher & Technical Education Department Secretary Esther Lalruatkimi pawh a Office-ah hmu nghalin Election Commission phalna tel lo chuan Scholarship hi an sem ngam loh thu a sawi niin MZP chuan an sawi a ni.
Hemi hnu hian MZP hian nimin tlai atang khan chawnghei-a lungawi lohna lantir rel mah se ECI chuan Mizoram Scholarship 2nd Installment sem phalna a rawn pek tak avang leh Mizoram Scholarship Board (MSB) pawh Scholarship sem turin an inbuatsaih nghal tih finfiah a nih avangin lungawi lohna lantir chu tihtawp nghal a nih thu MZP chuan an sawi a ni.
Comments
Post a Comment