Lenkawl

Mizoram UPC Kohhran-a thalai te intawh-khawmna lian ber, General PYD Inkhawmpui 2023 chu thla thar khian Serchhip-ah neih a ni dawn a, he Inkhawmpui neihna tur Pandal hi nimin khan Serchhip P&E Veng-a Leisekawt Mual-ah sak tan a ni.

Serchhip bialtu MLA Lalduhoma chuan zan khat riaka Serchhip rawn tlawhin nimin khan Aizawl a pan.

Tunhnaia Hmeichhe naupang kut inthlakna Video darh chungchangah thuneitute chuan chak takin hma an la mek.

Lungkawlh khuaa Sial vulhtute tan nimin khan Sial enkawl dan leh damdawi pek dan tur zirhona chu Agricultural Technology Management Agency (ATMA) Serchhip District buatsaihin Lungkawlh khua ah neih a ni.

Mizoram-a sawrkar Pisa hrang hrangah nimin khan 'Sadbhavana Diwas' thutiam lak a ni.

Federation of Mizoram Government Employee & Welfare (FMGE&W) bultumin Mizoram sawrkar hnuaia thawktute chuan Sawrkar thuchhuah dinglai anga Dearness Allowance (DA) hman phutin nimin khan a ni hnihna atan Badge dum an bel leh a, sawrkar atanga inbiak pui tumna emaw, thu lawmawm emaw dawn an la neih loh thu an sawi bawk.

Mizoram Pradesh Congress Committee (MPCC), Peoples Conference (PC) Party leh Zoram Nationalist Party (ZNP) te chuan Mizoram Secular Alliance’ tih hming vuahin thawhhona thuthlung nimin khan an ziak a, he thawhhona hi kan ramah Sakhaw zalenna a lo awm theih nan leh kan ram, kan hnam a lo him theih nana thawhhona tur a ni.

SEDP kaltlanga Champhai-a District Research Officers’ Quarters sak thar chu nimin khan Planning & Programme Implementation Secretary Lalmalsawma Pachuau chuan a hawng a, he building hi SEDP sum cheng nuai 28.92 hmanga sak a ni. Nimin-a Quarters thar hawnna hunah hian Lalmalsawma Pachuau chuan Economics & Statistics Department chu khawtlang tan an hnathawh a pawimawh takzet thu sawiin, Department in Data leh Statistics a tihchhuah te chu Mizoram sawrkar Department hrang hrangten an hmang tangkaiin an rawn fo thin avangin thawktute chu an Data lakkhawm leh buatsaih kawngah te pawh uluk taka hnathawk thin turin a chah bawk.

Manipur State chhung Tengnoupal District atanga mipui aiawh hruaitute chuan nimin khan Chief Minister Zoramthanga hmuin tunlaia Manipur buaina leh a kaihhnawih hrang hranga an thlavang a hauhsakna leh a hmalak sakna te avangin lawmthu an hrilh a, harsatna an tawhna hranga hrangah Mizoram sawrkarin a tanpui that avanga lawmthu sawiin, Zofate tan pa nih tlin taka hma a lak avangin an thlamuanpui hle tih an sawi a ni.

Art & Culture Department hnuaia Tribal Research Institute buatsaihin nimin khan Aizawl-a Chanmari YMA Hall-ah 'Mizo tual zal nun - hman leh tun' tih thupui hmangin Seminar neih a ni a, he hun hi Art & Culture Department Director Carol VLMS. Dawngkimi chuan a hmanpui a ni. Nimin-a Seminar-ah hian Prof. R.L. Thanmawia chuan 'Mizo tual zal nun - hmanlai' tih leh Prof. Malsawmliana’n 'Mizo tual zal nun - tunlai' tih thupui te an sawifiah a, Govt. Mizo High School atangte, Govt. Aizawl College-a Post Graduate zirlai atang te, IMFA-a Dance & Music zirlaite bakah Mizo Academy of Letters atangin mi engemaw zat an tel a ni.