Serchhip-ah PYD Inkhawmpui atan Pandal sak tan a ni

Mizoram UPC Kohhran-a thalai te intawh-khawmna lian ber, General PYD Inkhawmpui 2023 chu thla thar khian Serchhip-ah neih a ni dawn a, he Inkhawmpui neihna tur Pandal hi nimin khan Serchhip P&E Veng-a Leisekawt Mual-ah sak tan a ni.
Mizoram UPC-a thalai pawl, Pentecostal Youth Department (PYD) Inkhawmpui vawi 27-na chu September 22-24, 2023 chhung khian Serchhip-ah neih a ni dawn a, he Inkhawmpui neihna atan hian Serchhip P&E Veng-a Leisekawt Mual-ah nimin khan Pandal sak hnatlang hi neih tan niin Pastor Lalnghinglova chuan hunserh hmangin Pathian hnena hlanna a nei a ni. Pandal Structure hi UPC Mizoram in a neihsa chu Aizawl atanga rawn phurchhoh niin Nilaini khan Serchhip rawn thlenpui a ni a, Pandal Structure tundin hna hi chawlhkar khat chhung vela zawhfel hman beisei a ni.


General PYD Conference vawi 27-na neihna tur hian Pandal hi a dung ft. 150 leh a vang ft. 100-a zau-a sak tura ruahman a ni a, mi 3000 vel lenna tura ruahman niin nimin-a hnatlang ah hian Serchhip Bial PYD thawkin Thenzawl Bial PYD ten an rawn pui bawk a, General PYD-a hruaitute pawhin a hmunah an telpui bawk a ni.

Mizoram UPC Serchhip Bial PYD chuan tun tuma General PYD Conference an neih turah hian Mizoram hmun hrang hrang bakah State pawn lama Mission Field atangte pawhin palai rawn kal tura beisei an nih thu an sawi a, General PYD Conference hi an Kohhran-a PYD Inkhawmpui lian ber a nih thu  sawiin, khawmpui-a Palai rawn kal te hi Serchhip-a YMA Branch 8- New Serchhip Venglai, Chhekhnai, P&E Veng, Serchhip Kawn-pui North, Serchhip Kawnpui South, Serchhip Chhim Veng, Serchhip Hmar Veng leh Serchhip Dinthar Branch huamchhungah te thlen tir an nih dawn thu an sawi a ni. Nimin-a hnatlang hi bialtu MLA Lalduhoma chuan tlawhin Organising Committee hruaitu ten an lo dawngsawng a, hemi hmalam hian hnatlang puihna a lo hlan tawh a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar