Mipui aiawh ten CM an kawm

Manipur State chhung Tengnoupal District atanga mipui aiawh hruaitute chuan nimin khan Chief Minister Zoramthanga hmuin tunlaia Manipur buaina leh a kaihhnawih hrang hranga an thlavang a hauhsakna leh a hmalak sakna te avangin lawmthu an hrilh a, harsatna an tawhna hranga hrangah Mizoram sawrkarin a tanpui that avanga lawmthu sawiin, Zofate tan pa nih tlin taka hma a lak avangin an thlamuanpui hle tih an sawi a ni.

He hunah hian Chief Minister chuan Tengnoupal District dinhmun tlangpui leh harsatna an tawh dan te lo zawtin, hmalak zel dan tura thurawn an dil angin, a theih chin chinah a ralmuang zawng zela hmalakna siam a, Non-Violence policy kalpui tum tlat turin a chah bawk.

Chief Minister chuan Mizoram sawrkar in mipui harsatna tawkte mamawh phuhrukna leh tanpui theihna a neih apiangah theihtawp a chhuahsak zel dawn tih pawh sawiin, Mizoram leh Manipur inkalpawhna kawngte pawh Mizoram sawrkarin a chei tha chho zel dawn tih a hrilh a ni. Medical Emergency leh Lengpui Airport an mamawh ni atan sawrkar laipuiin Aizawl leh Churachandpur inkar Helicopter Service a remti tak avangin an harsatna tam tak a ziaawm phah a beisei thu a lo hrilh bawk.