Lenkawl

Nikum 2022 chhung khan Serchhip District chhungah Kangmei chhuak hmun 457-ah a awm nia chhinchhiah a ni a, kangmei chhuak-ah hian ram Hectare 1182.4 vel a kang nia chhinchhiah niin heng te hi Lo hal leh mimal ram kang te nia chhinchhiah a ni.

Serchhip District Football Championship 2023 chu nimin khan khelh zawh niin FC Serchhip Kawnpui chu an champion.

Serchhip-a Petrol Pump awmchhun, PB Lalzuithanga Filling Station-a Petrol leh Diesel pekchhuahna khawl tun thla tir lama chhia chu nimin khan siamthat niin dan pangngaiin Petrol leh Diesel pawh pekchhuah nghal a ni a. Petrol Pump enkawltute chuan tunah hian Petrol leh Diesel chhekkhawl sa an ngah thu sawiin, tuna an chhekkhawl bakah hian Load laa thang mek an awm thu leh heng te pawh hi reilote ah Serchhip rawn thleng thei tura beisei an nih thu an sawi bawk.

Kumin March 3-a Chapchar Kut hman dan tur chu nimin khan Serchhip-ah District Bawrh-sap Nazuk Kumar IAS hovin ngaihtuah a ni. He thutkhawm Serchhip DC Meeting Hall-a neih hian Chapchar Kut hi Leisekawt Mual-ah hman tura relin Serchhip Sub-Hqrs. YMA President chu Kut Thlengtu a ni anga, hun hman dan tur chipchiar pawh Serchhip Sub-Hqrs. YMA hian an lo ruahman dawn a ni. Kumin a Chap-char Kut-ah hian Kut Nu atan Bawrhsap ni tura ruahman niin thuneitu sang zawk atanga rawtna awmsa emaw, a dang a lo awm erawh chuan la tihdanglam leh theih a ni a. Kut lawmna nuam leh hlawhtling tak an buatsaih theih nan mawhphurhna neitu tur inruat a ni bawk.

Kum 2018-a naupang kumtlinglo pawng-sualtu a puh Zodintluanga, Zuangtui chu nimin khan Special Court (POCSO Act) chuan thiamloh chantirin Vawiin-ah hremna puan a ni ang. Court-in thuremna-a tarlan a nih danin, Zodintluanga hian kum 2018 September leh October thla khan naupang kum 12 mi chu Zoplast Factory-ah tum thum a pawngsual a, pawngsualtu-a puh hi hemi kum vek October ni 13-ah Police-in manin Special Judge (POCSO Act) chuan thiamloh a chantir ta a ni.

Nimin khan Aizawl SP Conference Hall ah Aizawl District Aadhaar Monitoring Committee chu thukhawmin mipuite tana Aadhaar hman tangkaina tur hrang hrang te, harsatna an tawh sutkian dan tur te leh Enrolment tihdan felfai zawk neih dan turte an sawiho.

Power & Electricity Department, Champhai buatsaihin nimin khan Electric hman dan chungchanga mipuite him tlanna tura inzirtirna, 'Public Awareness on Electricity Safety' chu Champhai-ah neih a ni a, P&E Department hotute chuan mipuite chu Electric Wiring man tlawm zawng mai lova a tha leh him chauh hmang turin an chah bakah Energy meter khawih chingpen leh Energy Meter kaltlang lova Electric pawha hman ching lo turin mipuite an ngen a. Sawrkar pawmpui Electrical Licensed Contractor-te kutah Inchhunga electric pawh leh zam hna a innghah thu sawiin, Internal Wiring chungchang a harsatna awmte an hnena thlen tur a nih thu an sawi bawk.

Sawrkar laipui hmalaknaa Fair Price Shop (FPS) te tih changkan leh hmasawnna tura rua-hmanna siam chungchangah nimin khan Khawzawl District Bawrhsap CC. Lalchhuangkima hovin District chhunga VCP ten an sawiho a. Nikum November thlaa Union Minister of State, Ministry of Consumer Affairs, Food & Public Distribution-in Mizoram a rawn tlawh tum khan Central Warehousing Corporation (CWC) hnen atangin Fair Price Shop sakna tura tanpui an inhuam thu leh chumi atan chuan ram ruak (vantlang ram, lei ngai lo tur) mamawh a nih thu hriat niin hei hi bawhzui a ni a. He huna kalkhawm te hi Fair Price Shop sakna turin ram ruak an neih leh neih loh bakah thil tul dangte zawh niin huntiam siamin an dinhmun te DC Office-a thehlut tura tih an ni bawk.

Finance Department changtu leh Chief Minister Zoramthanga chuan Mizoram sawrkar hnathawk ten Dearness Allowance (DA) pung an ngiat mek chu pe thei dinhmunah sawrkar a ding ngang lo tih a sawi a. Tun dinhmunah Mizoram chu State hrang hrang zingah leiba nei tlem 2-na a ni tih a sawi bawk.

Governor Hari Babu Kambhampati chuan Mizoram chu Ziak leh chhiar tamna ber State pakhat ni mah se Bank Services lama hawiharh kawngah erawh a hnufual pawl kan ni mek thung tih a sawi.