Bank Services lama hawiharh kawngah a hnufual pawl kan ni mek - Governor

Governor Hari Babu Kambhampati chuan Mizoram chu Ziak leh chhiar tamna ber State pakhat ni mah se Bank Services lama hawiharh kawngah erawh a hnufual pawl kan ni mek thung tih a sawi.

Financial Literacy Week 2023 hawnna nimin-a Mizoram Rural Bank Auditorium Aizawl-a neih a hmanpuina ah he thu hi sawiin Governor chuan Bank services lama hawiharh kawng chu kan tan lakna tur a nih thu a sawi a, Scheme tha tak tak atanga tanpuina kan hmuh tur te kan hriat loh avanga kan dawn loh hi tam tak a awm mek tih a sawi a. Sum hman dan tha zawk hriat hi khua leh tui te chanvo a nih thu sawiin, Vawiin a sum khawhral avangin hun reilote ah retheihna a thlen theih avangin sum enkawl dan dik hriat hi mitin mamawh a ni, a ti a. Insurance Scheme tha tak tak leh sum peipun dan tha zawk tam tak a awm thu leh tunah chuan mi tam ber in kan hriat chu Saving Account a ni mai tih sawiin, Bankers leh sawrkar Oficial te tan lak a ngai tih a sawi bawk.

Governor Hari Babu Kambhampati chuan India sawrkarin tihpuitlin a duh em em chu mitin ban phaka sum vawn dan tha zawk, Banking Services leh Digital Banking Services te chhawp a ni tih pawh sawiin, kum 2013 khan National Strategy for Financial Education chu tlangzarh a nih thu leh hemi kum atang hian hmasawnna kawng tam takah hmuh theihin a awm thu a sawi a. Kum 2014-a Pradhan Mantri Jan Dhan Yojana(PMJDY) kalpui a nih atang khan mitin deuhthaw leh chhungtin deuhthaw in Bank Account te neiin Banking Services an mamawh tawh a. Tunah hian mitin, chhungtin banphakah Banking Services a awm tak avangin sum vawn dan tha zawk leh Customer te venhimna (Financial Education and Customer Protection) kawngah chak zawka hmalak a ngai tawh a ni, a ti bawk.

Financial Literacy Week 2023 thupui atan ‘Good Financial Behaviour – Your Saviour’ tih hman niin he thupui hnuaiah hian sum khawl, uluk taka pawisa hmanna tur duanlawk, pawisa lut leh chhuak tur hisap lawk tangkaina bakah Digital Banking Service hrang hrang te tangkai zawka hman leh fimkhur dan inzirtirna te neih tum a ni a. Nimin-a he Hapta hawnna hunah hian Governor Hari Babu Kambhampati chuan RBI in a buatsaih, Booklet - Be(A)ware chu a tlangzarh bawk a. He lehkhabu-ah hian pawisa leh sum chungchanga inbumna hrang hrang atanga kan lo him zawkna tur te ziah a ni.

Nimin-a he hun hmanna ah hian Aizawl-a RBI hotute bakah Bank hrang hrang aiawhte pawhin thu an sawi bawk a ni.