Sawrkar hnathawk te DA pung pe thei dinhmun ah sawrkar a ding lo - Chief Minister

Finance Department changtu leh Chief Minister Zoramthanga chuan Mizoram sawrkar hnathawk ten Dearness Allowance (DA) pung an ngiat mek chu pe thei dinhmunah sawrkar a ding ngang lo tih a sawi a. Tun dinhmunah Mizoram chu State hrang hrang zingah leiba nei tlem 2-na a ni tih a sawi bawk.

    Nimin Assembly Session-a Budget a pharh zawh hnuah Assembly Annexe building-a Conference Hall-ah thuthar thehdarhtute kawmin, kum 2023-24 a State sawrkar thawhchhuah atanga sum lakluh, State's Own Revenues atanga hmuh beisei zat chu cheng vbc. 1981.29 a ni tih tarlangin, chu chu kum kal mek 2022-23 a beisei cheng vbc. 1637.73 atanga tehin 20.98% in a pung tih a sawi.

Chief Minister chuan hrileng avanga sum harsatna hian tun thlengin sawrkar sum ruahman siam kawngah harsatna a la siam chho zel tih pawh sawiin, Health Care Scheme atana cheng vbc. 60 a dah pawh hemi hnuaia damlote hnena pawisa ba rulhna atan a la tlem hle tih a sawi a, chuvang chuan Asian Development Bank atangin cheng vbc. 1000 puk tum a ni a, hei hi sawrkar laipui-in a remti tawh a ni, a ti a. Sawrkarin sum indaih lohna phuhrukna atan leh hmasawnna hnathawhna atana sum a puk thin chu sawrkar laipui leh Reserve Bank of India phal chin bak pela puk theih a ni lo tih a sawi bawk.

Thuthar thehdarhtute zawhna chhangin Finance Minister chuan sawrkar hnathawk ten DA tihpun an ngiat mek chu pe thei dinhmun ah sawrkar a ding ngang lo tih sawiin, “Pe i la, Finance in a tuar dawn,” a ti a. Sawrkar hnathawkte hlawh pek tlai thin an nih chungchang pawh zawhna chhangin, a hma thei ang ber leh a hun tak a pek thin chu sawrkar duh dan leh a hmalak mekna a ni tih a sawi a. “Pawisa min pe tute hian min pe tlai a, chuvangin keini pawhin hlawh kan pe tlai ve a ni,” a ti a. Sawrkar hnathawk ten hlawh an lak tlai vanga Bank Loan rulh kawnga harsatna an tawh pawh sawrkarin Bank lam hotute hnenah ngenna thlenin, Bank lam pawhin an hrethiam viau nia a lan thu a sawi bawk.

Chief Minister tarlan danin, India ram State zingah Sikkim chu leiba nei tlem ber niin Mizoram chu pahnihna a ni a. Sawrkar Flagship Programme SEDP chungchang tarlang bawkin, Beneficiary 60,000 te hnen a First Installment Rs. 25,000 pek tawh chu tun Financial Year chhungin 2nd installment Rs. 25,000 pek leh an ni dawn tih a sawi a, Financial Year tharah pawh a dawng tur thlan an nih leh tur thu leh chu erawh chu Committee lamin an la ngaihtuah tur thu a sawi bawk.