Lenkawl

Mizoram sawrkar in ruahmanna a siam anga Serchhip khawpui chhung Veng thenkhat a eirawngbawlna Gas Home Delivery kalpui thar turah ruahman anga kalpui tan a ni dawn ta a, Vawiin hian Serchhip-ah eirawngbawlna Gas hi rawn thleng tura beisei niin hei hi Online hmanga booking tih tawhna Veng-ah sem nghal tura ruahman a ni.

PHE Department in Serchhip khawpui chawmna atana Tui an pump-na khawl pui ber, Tuikum-a Electric Pump chu Ningani khan a chhe leh a, hei vang hian Tui thlitfim sa Pump turin Diesel khawl chauh hman theihin a awm mek a, a thlakna tur chah mek niin a rawn thlen hun tur erawh hriat ala ni lo thung.

Khawvel puma Rualbanlo te ni, International Day of Disabled Persons pualin Inrinni kalta, December 2, 2022 khan Serchhip-ah pawh Samagra Shiksha bultumin BRC Hall-ah hman a ni.

Serchhip District Cricket Association buatsaih Season Opening Tournament khelh mekah Tuikhuah Veng CC chuan Final an lut ta.

Zirtawpni atanga neih Serchhip District Wrestling Championship 2022 zawhfel takah Serchhip chuan Gold Medal 5 lain an Champion.

ZPM Leader Lalduhoma chuan kar kalta chhung khan Serchhip District chhung Tuikum AC-a Ngentiang, Thinglian, Hmunzawl, Rullam, Sialhau, Khawbel, Hmuntha leh Chhingchhip khua te tlawhin Vantlang inkhawm leh ZPM hruaitute nen inkawmhona an nei a. “Kan ram kan en hian kuthnathawktute kan thang lo a, loh theih loh avangin thingtlang lo kan la neih a ngai,” tiin “Thingtlang kuthnathawktute'n thingtlang lo neih kan bansan theih loh chhung hi chuan keini ZPM chuan thingtlang loneitute tan hian budget-ah pawisa engemaw zat dah a, a theihna kawng kawng a tanpui kan tum dawn a ni,” a ti a. ZPM chuan Bâna kaih Policy an neih thu leh thlai thar an lei dawn thu a sawi bawk.

Mizoram-ah COVID-19 hri leng in ziaawm lam a pan zel a, Inrinni khan Sample 75 enfiah leh niin heng atang hian hri kai mi pakhat hmuh a ni a, nimin khan hri kai enkawl dam an awm belh lo thung a ni. Heti hian nimin tlai thlenga Mizoram-a COVID-19 hri kai hmuh tawh chu 2,38,956 niin an zinga 2,38,224 te chu enkawl dam an ni tawh a, hri kai enkawllai mi 6 an la awm a, Aizawl District-ah 4 leh Lunglei District-ah mi pahnih niin hri kai hmuh atanga za zela 0.01 te enkawl an la ni.

PC Party chuan MNF sawrkar chu Lunglei Municipal Council-ah sawrkarna an chang zo dawn lova an inhriat avanga kumin a LMC inthlan buatsaih duh lovah an puh a. Lunglei Municipal Council Nodal Department changtu Deputy Chief Minister Tawnluia chuan kumin chhunga LMC inthlan a nih tur thu a lo puan tawh thu leh State Election Commission pawhin inthlanna tura tul leh pawimawh te peihfel a nih tawh thu October thla khan Sawrkar a hriattir tawh niin an sawi bawk.

Nimin zing dar 3:30 vel khan Aizawl atanga Sabualtlang pana tlan Pik-up Truck pakhat chu Thingfal khawdai-ah chesualin kawngthlang ah a tlanliam a, he Motor-a chuang mi 4- Lalba-hadur (25), Lalremtluanga (21), Eliza (11) leh John-a (21), Sabualtlang vek te chu a hmunah hian an boral a ni. He Motor chesual hi a tirah hriat ni mai lovin nimin chawhnu lam khan hriat a ni chauh a, lirthei tlanliamna hi awih tak niin Motor pawh hi a chhe hneh hle a, nimin tlai khan an ruang hi lakchhuah kim a ni.

Brahmaputra Board Meeting vawi 78-na chu Inrinni khan Aizawl-a Secretariat Conference Hall-ah neih a ni a, Brahmaputra Board Chairman Rajiv Yadav IAS chuan kaihruaiin Central sawrkar mi pawimawh tak tak leh North East State hrang hrang aiawhte an tel a ni. He Meeting-a an thu rel hrang hrang zingah Mizorama hmalakna tur, Springshed Management Project, Anti Erosion Project leh Survey & Investigation for Flood Protection and Mitigation Project, Khawthlang Tuipui te pawm a ni.