Lenkawl

Thla thar November 7 leh 11 inkar chhung khian Serchhip District-ah HIV/AIDS dona atan ‘Zoram harh rawh’ Campaign pualin YMA Branch te tan Mizo Hnam Lam (Folk Dance) leh Mizo Hnam Hla (Folk Song) hmanga inelna neih a ni dawn.

Thenzawl Zone Football Association (TZFA) buatsaih 26-Serchhip (ST) A/C huamchhunga Village Council te tana Football-a inelna, MLA Cup vawi 1-na chu nimin khan zawhfel niin Thenzawl West VC Team chu an champion a ni.

Samagra Shiksha Serchhip Block hnuaia School Management Committee (SMC) leh School Management Development Committee (SMDC) tan an hnathawh tur hrang hrang inzirtirna chu nimin khan BRC Hall, Serchhip-ah neih a ni.

Nizan atang khan SVEEP Serchhip District Inter-School Quiz Competition 2022 chu Govt. Serchhip College-a HD Rosanga Multipurpose Hall-ah neih tan a ni a, he intihsiakna hi Serchhip District chhunga High School leh Higher Secondary School te tana inelna tur niin District chhunga School 22 an tel a, nizan atang khan Elimination Round neih tan niin heng atang hian a tha zual 16 thlanchhuah an ni dawn a, Round of 16 inelna hi tunkar Ningani zan atanga neih tan tur niin intihsiakna hi tun thla ni 28 thleng neih tura ruahman a ni.

Mizoram sawrkar-a Rural Development Department in thuchhuah a siam angin Mizoram District tina ‘District Rural Development Agency’ (DRDA) chu ‘District Rural Development Office’ (DRDO) tia a hming thlak a ni ta a, hei vang hian Serchhip-a DRDA Office tia hriat thin pawh DRDO Office tia hriat tawh tur a nih thu leh indawrna zawng zawngah ‘Project Director, District Rural Development Office’ tih tawh tur a nih thu Serchhip DRDO Project Director chuan thuchhuah siamin a tarlang a ni.

Nimin tlai thleng khan Serchhip District-ah COVID-19 hri kai enkawllai mi pakhat ala awm.

MNF Thalai, Mizo National Youth Front (MNYF) President thar L. Thangmawia MLA chuan nimin khan Aizawl-a Mizo Student Union (MSU) Pisapui tlawhin MSU hruaitu thar ten an lo dawngsawng a, ram leh hnam thil chi hrang hrang sawihona neiin MNYF President chuan MSU-te'n an rorelna sanga Mizo tawng 8th Schedule a dah tura thu an lo tihtluk avangin lawmthu a hrilh bawk.

Chawlhkar khat awh tur ‘Zoram Medical College Week Exilcir-2022’ chu nimin khan Aizawl-a AR Lammual-ah neih tan a ni a, ZMC-ah hian MBBS zirlai 395 awmin, Zirtirtu 90 leh thawktu dang 417 an awm mek a ni.

Indian National Congress (INC) President thlanna atan nimin khan rampuma State Pradesh Congress Committee aiawhte’n Vote an thlak a, rampumah INC President thlang thei hi mi 9000 vel awmin Mizoram-ah pawh mi 71 ten Aizawl-a Congress Bhavan-ah Vote an thlak a, inthlanna a Vote tla te hi Oct. 19-ah New Delhi-ah chhiar a ni ang.

Nimin khan Lok Sabha MP C. Lalrosanga hovin Aizawl SP Conference Hall-ah District Committee on Sansad Adarsh Gram Yojana (SAGY) Phase VI Model Village Seling chu an thukhawm a, he Meeting hian SAGY hnuaia Model Village atana thlan Seling khua hmasawnna atana Village Development Plan duan sa chu pawmin, Plan chhungah hian Internal Road hrang hrang te, Seling Tui lak Phase-I siamthat te, Rain Water Harvesting Structure sak te, Anganwadi Centre siamthat te bakah hmalakna tur hrang hrang duan a ni a. Village Development Plan dang pawh siam belh a ni bawk. Lok Sabha MP chuan Seling khua Model Village-a siam tura ruahmanna ti hlawhtling tur chuan khaw mipuite an pawimawh thu he hunah hian a tarlang a ni.