MLA Cup-ah Thenzawl West VC Team champion

Thenzawl Zone Football Association (TZFA) buatsaih 26-Serchhip (ST) A/C huamchhunga Village Council te tana Football-a inelna, MLA Cup vawi 1-na chu nimin khan zawhfel niin Thenzawl West VC Team chu an champion a ni.
MLA Cup 2022 kharna hun nimin chawhnu-a Thenzawl Lothazawl Football Ground-a neih ah hian bialtu MLA Lalduhoma chuan Serchhip District chuan Sports lamah hma a sawn mek thu sawiin, “ISL, I-League leh Mizoram Team-ah te District chhunga player te kan thawh thin a, Phai lama Football Academy hrang hrangah kan bial chhung mi an awm nual a, Football hi eizawnna tlak a nih avangin heng player te hian sum tam tak an thawkchhuak tawh a, thalai naupang zawk te hian an hnung zui turin i in buatsaih ang u,” a ti. Bialtu MLA chuan Thenzawl chu puantahna khawpui a nih thu sawiin, Puantahtu ten hlawk zawka an Puantah an hralhchhuah theihna turin hmalak a nih thu leh Loom 15-ah enchhina turin Cotton tah tir mek niin puan Bu an zawhfel chuan hralhchhuah nghal char char theih a nih thu a sawi bawk.


Serchhip Assembly Bial tana buatsaih MLA Cup 2022 kharna hun hi TZFA President Liantluanga Renthlei chuan a kaihruai a, he inelna hi tun thla ni 3 khan khelh tan niin Serchhip atangin Team 3, Thenzawl atangin Team 4 leh Buangpui, Neihloh leh Kanghmun South atangin Team khat theuh, an vaiin Team 10 an tel a, Final-ah hian Thenzawl East VC Team leh Thenzawl West VC Team inhmachhawnin 2-2 in an inhnehtawk  a, Penalty Shoot-out hmanga chak zawnna ah Thenzawl West VC Team hi an chak a, Rs. 1,00,000/- bakah Trophy leh Medal an dawng a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar