Lenkawl

Serchhip Sub-Hqrs. YMA chuan NHIDCL hnuaia National Highway siamthat hna thawh meka hnathawh thalo leh Dan anga hnathawh ni lo chungchang chu Central YMA-ah thlen nise an ti.

Serchhip District chhung khaw hrang hranga Common Service Centre-Village Level Entrepreneur (CSC-VLE) te kaltlanga HDFC Bank hnuaia hamthatna leh Bank Loan lak theih dan te zirhona chu nimin khan Serchhip AOC Veng a HDFC Bank-ah neih a ni a, he hunah hian Lalruatliana, State Financial Institution (FI) ICTC; Vanlalmuanpuia Parte Area Head, CSC-HDFC leh Raymond Lalengkima, Sr. Executive HDFC ten Serchhip District chhunga CSC-VLE kalkhawmte hi zirtirna an pe a ni. Serchhip-ah hian kumin April 1 khan HDFC Bank hi hawn niin AOC Veng-ah mimal In luahin an awm mek a ni.

Tunhnaia Serchhip-a tuialhthei rawn thleng a khaihlak hlek avanga mipui ten harsatna an tawh chu a ziaawm chhoh thuai beisei a ni a, nimin khan Petrol phur Truck pakhat rawn thlengin Vawiin lam hi chuan dan pangngaia semchhuah leh theih beisei a ni a, Diesel pawh tunah hian lirthei hrang hrangah bithliah neia semchhuah mek niin permit dil erawh a ngai lo thung a, bur hmanga dawh phal a ni rih lo bawk a ni.

Kumin chhunga African Swine Fever (ASF) vanga Serchhip District chhunga Vawk thi chu 115 ni tawhin Vawk 161 suat a ni tawh.

Serchhip leh Hriangtlang inkar kawng chhia avanga Pik-Up Truck neitu ten karleh atanga mipui mamawh lakluh chawlhsan an tum thu an puan hnuah nimin atang khan PWD chuan he kawng cheithat hna hi an thawk nia thudawn a ni a, nimin khan Tuichawm chho vel siamin Vawiin hian kawng chhuat bal lai siamthat dan tur JE ten an en leh dawn nia thudawn a ni.

Mizoram Pradesh Congress Committee (MPCC) President Lalsawta chuan Mara Autonomous District Council-a Congress MDC 4-ten MNF an thawhpui chungchang ah tun thla ni 12-a an Party PAC thukhawm chuan Displinary Action Committee-in a zirchianna leh tul ang ang a thehluh chu an sawiho thu nimin a Aizawl Congress Bhavan-a inkhawm ah sawiin, “Congress MDC 4-ten Congress led government siama MNF an thawhpui hi PAC in a remtih loh a nih avangin PAC hi hemi chung-changa kan dinna hi a la ngai reng a ni,” a ti a, MNF leh BJP chu kum 2023 inthlan thlir ranin an thawkdun duhlo niin a sawi bawk.

ZPM Thalaite chuan Chief Minister Zoram-thanga enkawl PWD chu tlawmngai pawl in an enkawlpui hial ngai khawpa a awm chu vanduaithlak an tih thu thuchhuah siama tarlangin, dan keng-kawh tura intiam sawrkâr mipui in an puih ngaia a awm fo chu ngun taka ngaihtuah chuan thil zahthlâk a ni tih hrethiam turin Chief Minister chu an ngen tih an sawi a. PWD-ah chauh ni lovin hripui len lai atang tawha tlawmngai pawl leh Kohhran tel lova che thei miah lo sawrkar kan nei chu pawi an tih thu leh tlawmngai pawl leh Kohhran in an vilpui kher ngai lova dik tak leh tha taka hna thawk a, huaisen taka dan rorêlna kengkawh ve mai turin sawrkar chu an ngen bawk a ni.

India ram in British sawrkar atanga Zalenna a hmuh atanga kum 75-na lawmna, Azadi ka Amrit Mahotsav kal zel puala sawrkar laipui in Independence Day Week (9th-16th August, 2022) chhunga In tina Hnam Puanzar, National Flag zar vek tura ruahmanna a siam, Har Ghar Jhandan Programme kalpui dan tur chu nimin khan Siaha ah District Bawrhsap Lalsangliana hovin sawiho a ni a, hemi hun chhung hian sawrkar Pisa leh chenna In dang ah te Hnam puanzar hi zar vek tura ruahman niin Flag hi pakhat Rs. 20/- zela khul tur a ni dawn a ni.

Environment, Forest & Climate Change Department-a Senior Officer te chu nimin khan an Department changtu Minister TJ. Lalnuntluanga hovin Aizawl-a PCCF Conference Hall-ah thu-khawmin an hnathawh thlirletna an nei a, he hunah hian hna kal lai mek thawh tawh chin te, Forest Clearance/Environmental Clearance/Wildlife Clearance chungchang te bakah Department inrelbawl dan hrang hrang an sawiho a ni. He hunah hian Field Director, DFO, DCF, DCCF zawng zawng leh Principal FTS te an tel a ni.

Sawrkar laka thilphut nawr nana National Health Mission (NHM) hnuaia Mizoram-a thawk ten ni thum (3) chhung Mass Casual Leave leh ni hnih (2) chhung Indefinite Strike an neih hnuah nimin khan NEUM chuan Aizawl-ah Emergency Meeting an nei a, he hunah hian District hrang hrang aiawhte pawh telin, sawrkar-ah rawtna pathum (3) thlenin heng te hi sawrkar in a pawmpui thei a nih chuan an lungawilohna lantir chu tihtawp nise an ti a. Heng zingah hian NEUM hamthatna tur zirchiang tura Study Group kallai mek chu September, 2022 ralhmaa peihfel hman te, an thawh hlawh (Salary) thla tin regular taka pek ve leh NHM hnuia Contractual Staff te MESMA Order puan khum tawh loh te a tel a ni.