Kawng siam mek Central YMA-ah thlen nise ti

Serchhip Sub-Hqrs. YMA chuan NHIDCL hnuaia National Highway siamthat hna thawh meka hnathawh thalo leh Dan anga hnathawh ni lo chungchang chu Central YMA-ah thlen nise an ti.
Serchhip Sub-Hqrs. YMA hian nimin chawhnu khan Serchhip Sub-Hqrs. YMA Conference Hall-ah Executive Committee thutkhawm neiin Serchhip District chhunga National Highway-54 laihzauh leh siamthat hna NHIDCL hnuaia thawh mek chungchang an sawiho a. He hna kal mek hi hun engemaw chen kalta atanga an lo enfiah fo tawh thu leh hnathawh tha tawk lo tam tak a awm nia an hriat thu leh environment hum-halh chungchang ah pawh Dan zawm tur zawm loh tam tak a awm nia an hriat thu an sawi a. He kawngpui siamthat hna kal mek hi Serchhip Sub-Hqrs. YMA huamchhungah chauh kalpui a nih loh avang leh rampum huap thil a nih avangin Central YMA-ah Law Court-a khing tura an duh thu thlen nise an ti a,  hei bakah hian he kawngpui siam mek chungchang hi Prime Minister Office-ah thlen nise an ti bawk.

Serchhip Sub-Hqrs. YMA Executive Committee thutkhawm hi an President Kawlthuama chuan kaihruaiin ruihhlo dona kawngah chak zawka hmalak relin hemi kawngah hian Kohhran hrang hrangte pawh thawhhopui ah sawm nise tiin an huamchhunga Kohhran hrang hrangte pawh tawngtai thupui-ah lo nei tura ngen nise an ti a. Heng bakah hian an inrelbawlna atana thil tul hrang hrangte pawh he hunah hian sawiho a ni bawk.