Lenkawl

Serchhip NGO Coordination Committee chuan nimin khan thutkhawm neiin Serchhip District Hospital sak tur chungchanga an hmalakna ah lungrual takin an dinna ngaiah an la ding tih an sawi.

Govt. Higher Secondary School Serchhip chuan kumin a an zirlai HSSLC Exam a titha te chawimawina leh an zirlai thar te lawmna hun nimin khan Serchhip Auditorium-ah an buatsaih a, he hun hi Serchhip Bialtu MLA Lalduhoma chuan khuallian niin a hmanpui a ni. Govt. Higher Secondary School Serchhip in Felicitation cum Fresher Social an hman ah hian Bialtu MLA Lalduhoma chuan tunhnaiah Serchhip Bial chhungah zirna lam kaihhnawih lawmna chi hrang hrang a thleng chu lawmawm a tih thu sawiin, COVID-19 hri leng avanga hun harsa kan tawh karah he School in result tha tak an nei chuan Principal leh a thawhpui te inpekna a nasa hle tih a lantir thu leh lawmawm a tih thu a sawi a. Kumin a pawl 12 pass thar zirlaite chu an kal zelna turah duhthlanna uluk taka hmang tura chahin, College-ah chuan Subject thlanbik neih a tul dawn thu leh an tuina leh hlawhtlinpui tur, ram leh khawtlang tana an tangkaina tur ngaihtuaha Pathian leh chhungkua uluk taka inrawn chunga an duhthlanna hmang turin a chah a ni.

Serchhip District Anti-Tobacco Squad te chuan nimin khan Serchhip-a Pisa thenkhat tlawhin Meizuk khapna dan bawhchhia an awm leh awm loh an enfiah a, dan in meizuk a khapna hmuna zu mi pakhat manin pawisa chawitir a ni.

Serchhip District-ah nimin khan COVID-19 hri kai hmuhchhuah thar leh enkawl dam an awm belh lova, hri kai hmuhchhuah tawh zawng zawng chu 14,009 la niin an zinga 13,973 te chu enkawl dam an ni tawh a, hri kai hmuhchhuah atanga chhutin za zela 99.74 te enkawl dam an ni tawhin hri kai enkawllai mi pakhat ala awm a, harsatna dang a awm loh chuan hei hi Vawiin hian chhuahtir theih beisei a ni bawk.

Sawrkar damdawi In hrang hrangte Faina kawnga inelna, Kayakalp-2022 neih zawh taka Thenzawl CHC in lawmman an lak lawmna chu nimin khan neih a ni.

Serchhip-a Excise and Narcotics Department chuan nimin khan an hnathawh a hlawhtlinna leh an hnathawktu kaisang te lawmpuina hun an hmang.

Serchhip P&E Veng-a cheng Lalremruata, Arama tia hriat chu nimin chawhnu lam khan Serchhip Mat phai-ah chin hriatloha awmin he thu buatsaih lai thleng hian zawn mek a ni.

Meghalaya State chhunga ruahsur nasa leh tuilian in National Highway a tihchhiat avangin Mizoram-a POL lakluh chu ni 2/3 vel khaihlak thei a ni a, hei vang hian FCS&CA Department chuan Filling Station ten mipuite hnenah an mamawh tawk bak a chuang a liam pekchhuah loh tur a nih thu thuchhuah siamin a tarlang a, hei bakah hian Motor-a thun theih bak Gallon/Barrel hmanga tam tham tum khata pek-chhuah loh tur a nih thu a tarlang bawk. Hemi rual hian POL hralhchhuah dan tur pawh siam nghal ni bawkin Two Wheeler (Scooty)-ah litre 3 leh Motor Cycle-ah litre 5 pek theih niin LMV-ah litre 10, MMV-ah litre 20 leh HMV ah litre 40 pek tur a ni a, Buhfai/Essential Commodities phur Truck te chu an Challan milin an kal leh haw lam daih pek tura tih a ni bawk.

Mizoram State Rural Livelihood Mission (MzSRLM) hmalakna in nimin khan Zawlnuam RD Block hnuaia Village Organization te tanpui nan Self Help Group-te hnenah Custom Hiring Centre a hman tur Combined Rice Mill pahnih leh Oil Maker Machine pathum semchhuah a ni a, Combined Rice Mill hi Saikhawthlir leh Suarhliap te hnenah hlan niin Saikhawthlir VO hnuaiah hian Self Help Group 10 leh Suarhliap VO hnuaiah hian SHG 8 an awm a ni. Oil Maker Machine hi Saikhawthlir (Self Help Group-10), Chuhvel (SHG-13) leh Bung-thuam (SHG-16) Village Organization te hnenah pakhat theuh pek an ni a, Chhawhchhi leh Antam atanga Tel ei tur herna tura ruahman niin nimin a heng khawl semchhuahna hunah hian mithiam ten khawl hman dan tur an zirtir nghal bawk a ni.

India President thar thlanna chu thla thar July 17, 2022 khian neih a ni dawn a, he inthlanna neih tur atan hianElection Commission of India chuan Mizoram-a Assistant Returning Officer atan Mizoram Legislative Assembly-a Commissioner & Secretary H. Lalrinawma (Ph. No. 2322250/9436154599) chu a ruat a, ani bakah hian Presiding Officer atan Mizoram Legislative Assembly Secretariat-a Addl. Secretary Lalhmahruaia Zote (2322137/9436142998) chu ruat a ni bawk.