GHSS-a zirlai hlawhtlingte chawimawina leh zirlai thar lawmna hun Bialtu MLA hovin hman a ni

Govt. Higher Secondary School Serchhip chuan kumin a an zirlai HSSLC Exam a titha te chawimawina leh an zirlai thar te lawmna hun nimin khan Serchhip Auditorium-ah an buatsaih a, he hun hi Serchhip Bialtu MLA Lalduhoma chuan khuallian niin a hmanpui a ni.

Govt. Higher Secondary School Serchhip in Felicitation cum Fresher Social an hman ah hian Bialtu MLA Lalduhoma chuan tunhnaiah Serchhip Bial chhungah zirna lam kaihhnawih lawmna chi hrang hrang a thleng chu lawmawm a tih thu sawiin, COVID-19 hri leng avanga hun harsa kan tawh karah he School in result tha tak an nei chuan Principal leh a thawhpui te inpekna a nasa hle tih a lantir thu leh lawmawm a tih thu a sawi a. Kumin a pawl 12 pass thar zirlaite chu an kal zelna turah duhthlanna uluk taka hmang tura chahin, College-ah chuan Subject thlanbik neih a tul dawn thu leh an tuina leh hlawhtlinpui tur, ram leh khawtlang tana an tangkaina tur ngaihtuaha Pathian leh chhungkua uluk taka inrawn chunga an duhthlanna hmang turin a chah a ni.

Serchhip Bialtu MLA chuan Mizoram-a zirna bultan chhoh dan te sawiin, a tir lamah Kohhran ten zirna enkawlin sawrkar kut-a zirna a awm hnuah zirna a chhe ta em em tih a sawi a. Sawrkar School zingah building leh Zirtirtu pawh awmna, Zirlai erawh awmlohna kan neih belh zel tih sawiin, hei vang hian kan kalphung hi thlak tawh a tha em tih ngaihdan te pawh an neih thu a sawi a, School enkawl hna chu Privatize in, sawrkar in Budget-a zirna atana sum a dah te chu Kohhran leh Public School te tanpuina atan hmang mai se tih ngaihdan te pawh a awm tawh thu a sawi a. Serchhip Bial chhunga Neihloh khua ah pawh Zirtirtu awmte tan In luah mai tur a van bawk si avangin MLA Fund hmangin Zirtirtu Quarters sak tum a nih thu a sawi bawk.

Nimin a he hun hman hi he School Lecturer Samuel Saithuamliana chuan kaihruaiin he School Principal RK. Sanghmingliana chuan an School dinhmun te a sawi a, kum 1962-ah Serchhip High School tia din a nih thu leh kum 1996-ah Higher Secondary School-ah hlankai a ni tih a sawi a. An School chuan Higher Secondary School dinhmun an luah atangin HSSLC Exam ah tihchhiat lutuk an la nei ngailo nia sawiin, Mizoram-a sawrkar School ah chuan a chhuan-awm pawl an nih ve thu a sawi a. Thawktu indaih-lohna chu an harsatna tawh nasat ber a ni tih sawiin, chutihrual chuan Serchhip leh a District mipui ten an School kalna tlakah an ngai chho zel chu lawmawm a tih thu a sawi a. Kumin ah Class pakhat ah mi 50 vel awm theihna turah pawh zirlai 70 vel lai te admit an ni tih sawiin, an School-a lut tur leh Subject lak duh nei te chu anmahni duh ang ngei lak tir thin an nih thu leh Cut-off mak awm lova admission tih tir thin an nih thu a sawi a, heng mi ten result tha tak tak an nei zui thin chu lawmawm an tih thu a sawi bawk.

Nimin a he hun hmanna ah hian kumin HSSLC Exam result chhuaka an School atanga pawl 12 zirchhuak zingah Distinction a pass zirlai pahnih te hnenah chawimawina thilpek an hlan bakah Subject hrang hranga mark hmu sang ber theuh te hnenah chawimawina an hlan a. Kumin a HSSLC Exam result chhuakah khan an School atanga Arts-a mi 100 exam-ah 95 an pass a, Science-ah mi 30 exam in 28 an pass bawk a ni.

Nimin-a he hun hmanah hian an School a zirlai lo ni tawh te pawhin thu sawiin chawhnu lamah item hrang hrang entirin hun an hmang bawk. Tun dinhmunah Govt. HSS Serchhip ah hian zirlai 342 awm mekin Zirtirtu 27 an awm a, Arts Subject leh Science Subject zirna te a awm mek a ni.