Damdawi In fai lawmna nei

Sawrkar damdawi In hrang hrangte Faina kawnga inelna, Kayakalp-2022 neih zawh taka Thenzawl CHC in lawmman an lak lawmna chu nimin khan neih a ni.

 Thenzawl CHC Conference Hall-a Kayakalp lawmman dawn lawmna hun hi Thenzawl CHC-a Medical Oficer Dr. Benjamin Malsawmtluanga'n kaihruaiin Ward Superintendent H. Zodinglianin Kayakalp inelna a lawmman la thei tura an hmalak dan hrang hrang te a tarlang a, he hunah hian Thenzawl-a Sawrkar Department leh School hotute, VC leh NGO hruaitute an tel bawk a ni.

Thenzawl CHC hian Kayakalp inelna ah hian kum 2020-2021 ah CHC huangah Fai ber lawmman pakhatna dawngin, tangkafai cheng nuai 5 an dawng a, kum 2021-2022 ah lawmman pathumna dawngin tangkafai cheng nuai 2 an dawng bawk a ni. Thenzawl CHC hotute chuan Kayakalp lawmman an lakna kawngah CHC Staff te tanlakna piah lamah khawtlang hruaitute, mipui mimir tanlakna leh theihtawp chhuahna vang a ni tih sawiin, lawmthu an sawi a ni.