Lenkawl

Chief Minister, Zoramthanga chuan February ni 19 khian kumin sawrkar kum, 2020-2021 atana Mizoram sum ruahman (budget) chu Assembly House-ah a pharh dawn.

Lai Autonomous District Council (LADC) a ‘Nominated Member ten Sawrkar bukna ah vote an nei thei tur a ni,’ ti-a Nominated Member ten High Court-a an thlen chu Governor in thutlukna a siam tur atan dah a ni.

Nimin khan MSTA Office, Techers Inn, Aizawl-ah Mizoram Booth Level Officer Executive Meeting neih a ni. He Meeting hi an pawl President, Rodailova Pachuau chuan kaihruaiin Mizoram-a BLO tana hamthatna leh Electoral Roll dik leh felfai neih theih nana hmalak dan tur leh thu pawimawh tak tak rel a ni.

Mizoram Civil Service Aspirants’ Society (MICSAS) chuan nimin khan Aizawl Press Club-ah thuthar thehdarhtute kawmin, “Mizo zirlaite/thalaite Central Service-a tam zawk an tlin theih nan hmalakna awmze nei zawk a awm thei dah lo maw tiin Hnam chhan hnatlang kan han ko a ni,” an ti.

Nikum (2019) chhung khan Mizoram-ah TB vei nia rinhlelh mi 17171 enfiah an ni a, heng zingah mi 2927 te chuan TB an vei tih hmuhchhuah an ni.

Tunlai-a hrileng Coronavirus disease chungchangah nimin khan Health Minister, Dr. R. Lalthangliana hovin a Office-ah Meeting neih a ni a, Health Department, Home Department, GAD leh Aviation Wing lam hotute telin he hrileng laka invenna tur chungchangah ruahmanna chi hrang hrang siam a ni.

High School Zirtirtute intelkhawmna, Mizo-ram Secondary School Teachers’ Association (MISSTA) Sub-Hqrs. Serchhip chuan Vawiin hian Govt. H/S Serchhip-ah Conference an nei dawn a, hruaitu thlanna an nei nghal ang.

MJA Serchhip District chuan Vawiin hian SIRD Auditorium, Tarpitlang-ah Annual General Conference an nei dawn a, he hun hi Ser-chhip DC, Lalzirmawia Chhangte chuan khuallian niin a hmanpui ang. MJA General Conference ah hian chawhnu lamah rorelna neiin tlai lamah kum 2020-2022 chhunga an hruaitu tur thlanna an nei nghal dawn a, MJA General Hqrs. hruai-tute pawhin an rawn hmanpui dawn a ni.

Nimin khan L&L Football Tournament chu DC Playground, Khawtetlang-ah khelh leh niin Chhekhnai FC in FC Serchhip Kawnpui 3-2 in an hneh a, AWC FC in Chanmari FC 7-0 a an hneh bakah Thenzawl Dinthar FC in Leisekawt FC chu 6-3 in an hneh bawk. Vawiin-ah dar 10:00 atangin inkhelh chhunzawm leh a ni ang.

 Siaha-a Inter-District Volleyball Championship-ah Serchhip District Mipa Team chuan Final thleng zo lovin an tla ta a, nimin khan Semi Final-ah Champhai District chu hmachhawnin a vanduai zawkah an tang a, Champhai District leh Saitual District ten Final an khel ang. Tarlan tawh angin Serchhip District Hmeichhe Team te chuan niminpiah khan Qurter Final-ah hnehna chang zo lovin an lo tla tawh bawk a ni.