Coronavirus disease chungchanga Mizoram-a hmalak dan tur sawihona neih a ni

Tunlai-a hrileng Coronavirus disease chungchangah nimin khan Health Minister, Dr. R. Lalthangliana hovin a Office-ah Meeting neih a ni a, Health Department, Home Department, GAD leh Aviation Wing lam hotute telin he hrileng laka invenna tur chungchangah ruahmanna chi hrang hrang siam a ni.

He thutkhawm ah hian Dr. F. Lallianhlira, Principal Director H&FW chuan he meeting pawimawhna te leh Corona virus natna laka Mizoram kan lo inven dan tur a sawi a. Dr. Pachuau Lalmalsawma, Epidemiologist & State Nodal Officer, Integrated Disease Surveillance Programme chuan he natna chungchanga thu thar leh Central Ministry-in hmalakna tur a duan chungchangte a sawi bawk.

He Meeting-ah hian Lengpui Airport-a zin veivakte lo endika, a tul anga Screening neih dan turah ruahmanna a siam a. Lengpui Airport chu Action point pawimawh tak a nih dawn avangin hriselna lama thawktuten uluk taka zin mite lo check nise tih a ni a. Lengpui Airport lam thuneitute pawhin a tul anga hma an lo lak tur thu an sawi nghal bawk. Hei bakah hian ram dang atanga Mizoram lo luh theihna khan hrang hrangahte pawh he endikna hi uluk taka kalpui tan nghal vat ni se tih a ni a, Home Department lamin hemi chungchang hi an lo bawhzui nghal bawk dawn a ni.

He natna vei nia rinhlelh dahhranna tur pawh Mizoram sawrkar chuan Falkawn Referral Hospital-ah a ruahman fel nghal a. Thawktu lamte pawh thil tul a awm a niha arang thei ang bera che chhuak nghal zung zung thei turin inralrin tir an ni bawk a. Coronavirus vei nia rinhlelhte thisen sample phai lama thawn dan tur pawh rel nghal niin sum leh pai senso tul turte pawh sawrkar in a ngaihtuah nghal bawk. He Meeting-ah hian Cocornavirus natna chungchang bika a tul anga hma latu tur Task Force Team din nghal ni se tih a ni bawk a. He natna avanga sum leh pai senso tul awm thei zawng zawng hi sawrkar chuan a ngaihtuah tur thu a sawi.

Coronavirus hrileng chungchangah hian Social Media-ah thu leng vak belhchian dawllo a awm nual nia an hriat avangin H&FW Department chuan mipuite chi-ai phah nana hmang lo turin a chah a. |ul bik thilah chuan heng Mobile No. 9436195535 emaw, 9612326762-ah emaw whatsapp hmangin zawh theih an ni ang.