Changtlung taka NIT Mizoram kalpui chu sawrkar leh mipuite duhdan a ni - H&TE Minister

Higher & Technical Education (H&TE) Minister Dr. Vanlalthlana chuan National Institute of Technology (NIT) dangte ang bawkin changtlung taka NIT Mizoram kalpui chu sawrkar leh mipuite duhdan a nih thu a sawi.

Lengpui rama National Institute of Technology (NIT) Campus chu nimin khan Higher & Technical Education (H&TE) Minister Dr. Vanlalthlana hian tlawhin NIT dangte ang bawka changtlung taka NIT Mizoram kalpui chu sawrkar leh mipuite duhdan a nih thu sawiin, ram tana rohlu tak ni tura ngaih NIT Campus Lengpui buatsaih kawnga tun thlenga hmalak tawh chin chu lungawi thlak loh a tih thu leh sum sen ral tawh leh hmalakna inmil lo chu ngaihmawhawm a tih thu a sawi a. NIT chu Mizoram mai ni lo, India ram tana zirna In pawimawh leh thalaite tana thiamthil zirna kawnga hmun pawimawh tak a nih avangin tihhmasawn kawngah theihtawp chhuaha tanlak tlan a ngai a ni, a ti a. Zau zawka inrawnkhawmna neih hnuah a tul angte sawrkar laipui hnena thlen thuai a tum thu a sawi bawk.

He hunah hian NIT Mizoram aiawhin Prof. Ajmal Koya, Registrar leh thawktu dangte'n Minister hi lo dawngsawngin hmalak tawh chinte an lo hrilh a. Contractor IRCON kaltlangin a hungna siam, PCC flooring, Internal Road, Electric pawh luhna leh a hmun siam rem (leveling) thawh a nih thu an sawi bawk.

Hmalakna te enfiahna atanga a lan danin sum sen ral tawh atanga thlen chinte inmil lo ni a hriat a ni a. NIT hotute chu Campus chhunga hmalakna leh hmanrua reng reng neitu thinlung pu chunga enkawl tura chah an ni a. Ram tana chhawrnahawm tak tur NIT Mizoram in a nihna ang tur tak a thlen theih nana hmalak leh bawhzui tulte pawh ngaihtuahho a ni a. Heng bakah hian Riverine Forest Reserve huamchhunga awm a nih avanga Dan anga chak zawka hmalak tulte pawh sawiho a ni.

NIT Mizoram hi a tir lamah NIT Nagpur hnuaia bul tan a ni a, kum 2011 atang khan mahnia inrelbawl tanin tunah hian Course hrang hrangah zirlai 900 chuang an awm mek a. Lengpui-a NIT Campus nghet dinna tur hian kum 2020 January thla khan Union Cabinet meeting chuan sum cheng vbc. 669.75 a lo sanction tawh a. Cheng vbc. 334.78 lai hman ral a nih tawh hnuah ‘Riverine Reserved Forest a ni, tia Forest Department in complaint a thehluh avangin hnathawh kal lai zawng zawng tihtawp vek a ni a. Pawisa sanction tawh atangin cheng vbc. 334.97 lai hman chhunzawm theih lohin a la tang nghe nghe a ni.