Sum harsat vangin sawrkar hnathawk ten July thla hlawh an la tlai dawn
Finance Department hotute chuan Mizoram sawrkar hnathawk ten hlawh an lak tlai tur thu hi sawiin, hetianga sawrkar hnathawk hlawh sem tihtlai a nih dawn chhan hi sum harsatna vang a ni a, sawrkar laipuiin Share of Central Taxes leh Post Revenue Deficit Grant a rawn pekchhuah hunah hlawh hi pekchhuah theih tum a ni. Sawrkar Department hrang hrang chuan an hnathawkte hlawh tur Pay Bill hi July 20, 2022 bawr vel khan an thehlut vek tawh a. Mahse an lak theih hun tur a hriat rih loh thu Treasury Officer-te’n an lo hrilh ni a thudawn a ni. Mizoram-a Treasury lian pahnih, Aizawl South leh Aizawl North Treasury-in pawisa an pekchhuah hnuhnun ber chu July ni 21, 2022 kha a ni a, hemi hnu hian sum hman khuahkhirh a nih tak avangin pawisa an pechhuak leh ta rih lo a ni.
Finance Department hotu pakhat in AIR Aizawl a hrilh danin tunhma a Treasury khar ang kha a nih loh thu a sawi a. Tunah hian rikrum thil leh tul bik thilah chuan pawisa hman tur a awm niin a sawi a. Reserved Bank of India (RBI)-a Mizoram sawrkar account-a ngei ngei a awm tur, a mawngphah pawh lakchhuah a la awm loh thu a sawi bawk a. Chutih lai chuan sum harsatna avangin Special Drawing Facility leh Ways and Means hmanga sum puk a nih tawh thu a sawi a ni.
Hetianga sum harsatna a awm chhan hi tunhnaia sawrkar laipuiin Centrally Sponsored Scheme (CSS) sum a pekchhuahte ni 21 chhunga a hmangtu tur Department-a pe vek tawh tura State zawng zawng a hriattir vang a ni ber nia thudawn a ni a. Mizoram sawrkarin CSS sum, RBI-a Mizoram sawrkar account-a hman lohva a lo dahte chu a hlawma pekchhuah a ngai ta a, cheng vbc. 600 vel lai pekchhuah a nih tak avangin harsatna hi lo thleng a ni a. Finance Department hotute chuan General Financial Rules leh Treasury Rules in hman nghal mai loh tur Department-in pawisa hlawm lian an kawl a khap avangin tunhma zawng zawng chuan an sum hman dan ang zelin CSS sumte hi a tahtawlin Department-ah pek a nih thin thu an sawi a. Chubakah RBI-a sawrkar account-a a awm khan sum harsatna awm thei a veng a, phal a nih tak lohva, a hlawma sum tam tham vawi leh khata pekchhuah a nih takah khan sawrkarin sum harsatna a tawk ta a ni, an ti.
Sawrkar hotute chuan tunah hian sum harsatna a awm ngei tih an phat loh thu an sawi a. Chutih rualin kum 1997-98 chho vela RBI thupek avanga Treasury khar ang chi kha chu a la thleng lo niin an sawi a. State sawrkarin RBI-a a Account-a sum awm tur zat bituk awm tawh lo leh, pawisa puk belh pawh rul thei lova a awm chuan RBI chuan a sum enkawltu State Bank of India (SBI) chu State sawrkar hnena sum pechhuak tawh lo turin thu a pe anga. Chutianga sum khawih tur an neih tak lovah chuan Treasury khar tih tawngkam hi a lo awm ta a ni, an ti.
Tun dinhmunah chuan RBI lam thupek ni lovin Mizoram sawrkar sum dinhmun enin rikrum thil leh a tul zual tih loh chu pekchhuah rih loh nise tiin sawrkarin sum pekchhuah hi a thunun mai niin an sawi bawk a ni.
Tarlan tawh angin sawrkar hnathawk te hlawh tur hi thla tawp Pisa kai ni tawp ber atangin Treasury hian an pechhuak thin a, July thla a sawrkar Pisa kai ni hnuhnung ber Zirtawpni thleng khan Treasury te chuan hlawh hi pekchhuah la nei lovin tunkar pawh hian pekchhuah a beiseiawm rih vak loh a ni.
Comments
Post a Comment