Court hmaah harsatna an hmachhawn lohna turin NHIDCL leh Contractor te an hna thawk tha turin hriattir an ni
Mizoram State Project Monitoring Committee (MSPMC) te hian nimin October 10, 2024 khan MSPMC Secretary Er. Lalthanzuala Ralte hovin NH-54 kawngpui siam mek Chhiahtlang-Serchhip-Keitum Road chu a hmunah tlawhin an enfiah a. Lei tawlh leh Retaining Wall chim leh tlabal te, kawngpui bawl leh khuar (po holes) tam lutuk te, leimin venna atana an dah Gabion Wall chim te bakah leitawlhin a nghawng thildang te a hmunah an endik a. Chhiahtlang atanga tanin Serchhip leh Keitum thlengin uluk taka an endik hnuah NHIDCL aiawhte leh Contractor te nen Serchhip DC Meeting Hall-ah kawng chungchang hi an sawiho leh bawk a ni.
Serchhip DC Meeting Hall-a thutkhawm-ah hian MSPMC Secretary Er. Lalthanzuala Ralte chuan NH-54 kawngpui an endik chhan sawifiahin, Fur khat pawh daih mang lo, kawng siam zawhfel a nih hmaa kawng chhia tam lutuk te, a dotu bang chim nasa lutuk te leh harsatna dang thlengte avangin Chief Minister Lalduhoma duh dan anga endik tura lo kal an nih thu a sawi a. NHIDCL leh Contractor te chu an contract chungchangah leh Court hmaah harsatna an hmachhawn lohna turin a tha thei ang bera siamthat hna rang taka thawk turin a hrilh a. He kawngpui hmangtu Mizoram mipuite chuan kawng quality tha leh tlo siam turin beiseina sang tak an neih laia hun reilote chhunga hmun tam takah kawng a chhe ta mai chu mipuite an lungawi loh thu a sawi a. Kawng hmangtu ten harsatna leh chhiatna nasa zawk an tawh loh nan a repair hna rang taka thawk tur te, an hnathawh dan tur ruahmanna chipchiar a rang thei ang bera buatsaih tur leh Serchhip DC leh MSPMC hnena thehlut turin a hriattir a. Kawng repair hna an thawhna ah harsatna an nei a nih chuan MSPMC chuan tanpui turin a inhawng reng tih hrilhin, quality tha taka hna thawk turin a hriattir a ni.
Serchhip District Bawrhsap Paul L. Khuma kaihruai he inkawmna ah hian MSPMC Member te hian he kawngpui siam an hmuh dan te an sawi a, kawng siamna leh Retaining Wall siamna atana Contractor te hmanraw hman (material) leh an hnathawh quality an duh khawp loh thu te, Material tha karah material tha tawk lo hman a awm thin thu te, Engineering defect a awm nia an hmuh thu te, Pavement innghahna lei insawh nghet tawk lo (subgrade failure) a awm thu te, tuihawk luan kawr an siam in duhthu a sam loh thu leh siam that leh cheithat ngai thil tam tak an hmuh thu an hrilh a. A leilung zirchianna an neih that leh that loh thu te, Soil Test an neih dan te zawtin, Laboratory a test an neih zawng zawng te kimchang taka thehlut turin an hriattir a ni.
Contractor te pawhin ruahsur nasa avanga harsatna an tawh dan te he hunah hian thlen ve bawkin, a theih chin chinah kawng chhia siamthat hna an thawh mek thu leh, Furpui a reh veleh rang taka chak lehzuala an thawh theih an inbeisei thu an sawi a ni.
Nimin-a he kawngpui endiktute zingah hian MSPMC Member Er. H. Laldintluanga, Er. Vanlalneiha Ralte, Er. Lalrinawma, Er. Laltlanthangi Ralte bakah MSPMC Task Force member te, MZU leh PWD lama mithiamte an tel a ni.
Mizoram State Project Monitoring Committee (MSPMC) hian kumin May 24 khan Serchhip leh Keitum inkara NH. 54 siam hna thawh hi an lo tlawh tawh a. Hemi tum hian leivung paihin Serchhip leh Keitum chhehvel ram a nghawng dan leh huan leh ram a tihchhiat siam that hna thawh dante bakah hmabak chhunzawm dan turte an enfiah a ni.
Comments
Post a Comment