Lenkawl

Mizoram hmun hrang hrangah Valentine’s Day puala thisen pekna hun chu nimin khan buatsaih leh niin Serchhip-ah pawh he ni pual hian thisen Unit 19 pek a ni.

Pradhan Mantri Matsya Sampada Yojana (PMMSY) hnuaia Leilet-a Sangha khawi tanpuina dawng turte chu nimin khan an hnathawh dan tur zirtir an ni.

Serchhip Fire Station-a thawktute chuan nimin khan District Hospital Serchhip-a thawktute tan kangmei laka him dan leh inven dan zirtirna hun an buatsaih a, he hunah hian LFM Laldinsanga chuan kangmei lo chhuah thin chhan leh a inven dan tur bakah kangmei a lo chhuah thulha chet lak dan tur hrang hrangte a zirtir a. FM R. Laltanliana chuan Fire Extinguisher hman dan leh a enkawl dan te a zirtir bawk a. Kangmei chhuak a awm a nih chuan a rang thei ang bera Fire Station hriattir tura hrilh an ni bawk. Nimin-a he zirhona hunah hian Serchhip District Hospital-a thawktute hi District Medical Superintendent Dr. ZD. Lalmuanawma hovin an tel a ni.

Thla thar March 1-a Chapchar Kut lo thleng tur Serchhip-a hman dan tur chu nimin khan Addl. DC James Lalnithanga hovin sawrkar mi pawimawh leh tlawmngai pawl hrang hrang ten Serchhip DC Meeting Hall-ah an sawiho.

EF&CC Department-a thawktute chuan Sava leh Nungcha dang tam tak tihlumtu leh an chet dan Youtube channel-a pholang thin mi 2 te chu manin Wildlife (Protection) Act, 1972 hnuaiah pawisa chawi tira hrem an ni a. Heng an mi man te hi Joseph Hmangaihzauva (27), South Vanlaiphai (Sikul Veng) Hnahthial District, a Youtube channel 'Puiloa zinkawng' tih leh Lalmuansanga (32), Phunchawng, Aizawl District, a Youtube channel 'Sangtea Mifel em em' tih te an ni a. An thangkam en lai leh nungcha chi hrang hrang an awk lai te chu an Youtube Channel-ah hian an phochhuak thin a ni.

Lawngtlai District Legal Services Authority (DLSA) bultumin nimin khan Lawngtlai District Jail-a tang leh anmahni enkawltute rilru leh taksa hriselna endiksak an ni a, he hun hi Chief Judicial Magistrate (CJM) Jothansangi Tlau chuan hmanpuiin Dan chuan Jail tang an ni emaw, rualbanlo pawh ni se, mihring an nihnaa en kan thianglo an ni tih a sawi a, a theih ang angin District Jail tangte hmakhua pawh District Legal Services Authority, Lawngtlai chuan a ngaihven reng tih a sawi bawk. He hunah hian Medical Team ten Jail tang mipa 27 leh hmeichhia 1 bakah thawktute hriselna an enfiah sak a ni.

Mizoram Youth Commission (MYC), Mission Foundation Movement (MFM) leh Population Survey International, Delhi te chuan thalai, a bikin Home-a awm mek ten an tui zawng leh thiam zawng lama thawh tur an neih theihna tura Skill Development leh Entrepreneurship training buatsaih sak a, Home an chhuahsan hnuah pawh thawh tur an neih ngei theihna tura hmalak pui an nih theihna turin nimin khan Aizawl-ah Thawhhona thuthlung an ziak.

Niminpiah tlai-a Central YMA Committee Room-a NGO Coordination Committee (NGOCC), Mizoram thukhawm chuan India leh Myanmar ramri hung tum leh Free Movement Regime (FMR) thiah duhlohna lantirna punkhawm huaihawt a rel a. He thutkhawmah hian FMR thiah leh ramri hung duhlohna leh sut leh tura ngenna Union Home Minister hnena Memorandum an thehluh chungchang te an sawiho bakah hmalak zel dan turte relin, Feb ni 21, 2024-ah Aizawl-a Vanapa Hall ah punkhawm huaihawt nise an ti a. Hei bakah hian hmalakna tur dangte an rel bawk.

Mizoram Movement for Old Pension Scheme (MIMOPS) hruaitute chuan nimin khan Chief Minister Lalduhoma chu a Pisa-ah hmuin Chief Minister's Relief Fund atan Rs. 10,000/- an chhunluh bakah Old Pension Scheme hnuaiah sawrkarin lalut ve se an duhna te an thlen nghal a. Chief Minister chuan inthlan hma khan thu an tiam ngam lo tih lo hrilhin, “State Study Team te zirchianna kan ngaichang phawt duh a ni,” a ti a. “India ram pum huapa kan chai mek a nih avangin Central sawrkar zawk pawh hian a la rawn tidanglam duh hial mai thei. Tuna kan tihtheih chu Mizoram State Study Team te ngaihchan phawt a ni a. Anni pawh hian Central Study Team report an la ngaichang leh dawn ni te in a lang a. An report te han hmu phawt ila, kan la sawi ho leh dawh nia,” tiin sawrkar dinna a lo hrilh a ni.

MNF Party chuan Free Movement Regime thiah a ni chu an do tlat tih sawiin, Ramri hung tura hmalakna pawh na takin an dodal zel dawn tih an sawi.