Serchhip-a Chapchar Kut hman dan tur rel a ni
He sawihona hunah hian Serchhip Addl. DC chuan Chapchar Kut hlim leh lawm taka mipui ten kan hman theih nan a huaihawttute'n rilru inhawng leh tihtak zeta ngaihtuah a pawimawh thu a sawi a. State Level-ah Chief Minister kaihhruaina hnuaiah hman dan tur rel niin District tinah pawh he hun hi hmang tura tih a nih thu a sawi a. Mizo Culture vawnhim nan te, thangthar ten Mizo nunphung an hriat theih nan te, kan Hnam rohlu chawisan a, chhawmnun zel a nih theih nan te Chapchar Kut hi a pawi-mawh takzet tih a sawi a ni.
He Meeting hian kumin a Chapchar Kut chu March 1, 2024 chawhma dar 11:00 khian Serchhip Sports Complex-ah hman nise an ti a, Serchhip District Bawrhsap chu Kut Thlengtu ni tura ruatin Kut Pa atan Tuikum Bialtu MLA leh Agriculture Minister PC. Vanlalruata chu sawm nise an ti a. Chapchar Kut 2024 hmanna tura thil tul hrang hrangte sawiho niin, a Programme kimchang duangtu tur atan Serchhip Sub-Hqrs. YMA te chu ruat an ni. Power Supply, Tui in tur, Medical leh Sanitation te chu a changtu sawrkar Department te kutah dah a ni a. Security chu District Police te kutah dahin a puibawmtu tur atan YMA te ruat nise an ti bawk a ni.
Chapchar Kut ah hian mipui nawlpui tel theihna tur Mizo infiamna chi hrang hrang te, Mizo hnam lam chi hrang hrang thlir tur leh Zaithiamte zai ngaihthlak tur a awm dawn a. Serchhip Sub-Hqrs. YMA chuan Chapchar Kut-ah hian YMA Branch te chu Cheraw (Kantluang) leh YMA Chhang te Tlang lam a huho a entir nise a lo ti tawh bawk a. Chapchar Kut Organising Committee chuan Chapchar Kut-ah mipui a tam thei ang ber tel turin an sawm a ni.
Comments
Post a Comment