MNF in FMR thiah leh ramri hung an do tlat tih an sawi

MNF Party chuan Free Movement Regime thiah a ni chu an do tlat tih sawiin, Ramri hung tura hmalakna pawh na takin an dodal zel dawn tih an sawi.

Nimin-a thuchhuah an siamah MNF Party chuan Central Sawrkarin tunhma atanga tih a tum, sawrkar kalta MNF kaihhruai in a do tlat chu Sawrkar thar kan neih tak achinah na lehzualin Central-in hma a rawn la ta tih sawiin, Myanmar nena kan inrinaa zalen taka khawsak theihna, Free Movement Regime a siam pawh Manipur Chief Minister duhdan angin a rawn titawp nghal thu leh Ramri hung hna pawh thawh a tum nasa hle tih hriat a ni zui bawk tih an tarlang a. Kan Sawrkar neih mek chu Central-a BJP kaihhruai sawrkar hian a zuam hle ni ah an ngaih thu an sawi a ni.

MNF Party chuan Central Sawrkar hmalakna kal mek Free Movement Regime tihtawp a ni chu na takin a do zel dawn tih sawiin, hemi avanga kan unau Myanmar lam leh Mizoram lam ramri depa cheng mekte harsatna an tawh mek chu a rang thei ang bera sukiang turin Mizoram Sawrkar chu an ngen tih an sawi a. Ramri hung tura hmalakna kal mek pawh tuna ramri hi barh-luih ramri a ni tih pawma Central Sawrkar hnena titawp tura na taka hma la nghal turin Mizoram Sawrkar an ngen thu an tarlang bawk a ni.

FMR leh Ramri hung chungchanga NGOCC hmalakna chu MNF chuan a thlawp tlat tih pawh sawiin, nghet taka ding a, kan ram leh hnam chhan nana chak taka hma la chhun-zawm zel tura an beisei thu leh duhsakna an hlan thu an sawi a. “Kan unau Myanmar a awmte pawh kan inpumkhatna leh unau na tichhe zawng leh Ruihhlo chi hrang hrangte Mizoram kaltlang tur leh Mizoram chhunga rawn lalut tawh lo tur in MNF chuan a ngen in a hriattir bawk,” tiin an thuchhuah ah hian an tarlang a ni.