Serchhip leh Mizoram hmundang-ah Valentine’s Day puala thisen pekna hun buatsaih a ni

Mizoram hmun hrang hrangah Valentine’s Day puala thisen pekna hun chu nimin khan buatsaih leh niin Serchhip-ah pawh he ni pual hian thisen Unit 19 pek a ni.
Valentine’s Day puala thisen pekna hun hi Serchhip-ah chuan District Hospital Blood Bank, Association for Voluntary Blood Donation (AVBD), Mizo Zaimi Inzawmkhawm (MZI) leh DIET Serchhip te chuan DIET Serchhip-ah an buatsaih a, hemi puala inkhawm tawi AVBD Serchhip Branch Vice President Laldinpuia kaihhruai a neih ah Serchhip Blood Bank Officer Dr. Lalnunhlima chuan tun dinhmun ah Serchhip District in thla khat-ah thisen Unit 80-90 vel a mamawh tih sawiin, thisen kan pek te hi ni 35 chhunga hman a tul avangin tum khat ah thisen tam tak tak an lak theih thin loh thu a sawi a. Serchhip District-ah tlawmngai thisen pe duh an thahnem ta hle tih sawiin, hei vang hian damlo mamawh te tana thisen pek tur khaihlak pawh an nei ta meuh lo tih sawi a, tlawmngaia thisen pe thin te chungah lawmthu a sawi bawk a ni.


He hunah hian AVBD Serchhip Branch-a Secretary T. Biakchamliana chuan AVBD te kalphung leh an hnathawh dan tlangpui sawiin, DIET Serchhip atangin Lecturer John Zorammawia leh MZI Hqrs. Serchhip atangin Secretary C. Zodinthara ten thu an sawi a. Hemi hnu hian thisen pekna hun hmang zuiin mipa 10 leh hmeichhia 9, an vaiin mi 19 ten thisen an pe a, thisen pek hun chhung hian MZI member ten kalkhawm te zaiin an awi reng bawk a ni.

Aizawl-ah chuan Valentine’s Day puala thisen pekna hun hi Dawrpui Multipurpose Hall-ah buatsaih niin Sports Minister Lalnghinlova Hmar chuan a hmanpui a. Ram changkang apiangin thisen pek an uar thu sawiin, khawvel-a thisen pek za zela 40 chu khawvel ram hausa leh changkang an nih thu leh, a petute hi khawvela mihring awm zat atanga chhuta za zela 16 chauh an nih phak thu a sawi a. Thisen pek chu changkanna leh hmasawnna intihhmuh tur chi tak a nih thu sawiin, thisen pek runpui bultantu leh chhawmnung zeltu bakah senso tumtute thahnemngaihna fakawm a tih thu a sawi a. Thisen pek chu thil inchhirawm loh tak a nih thu leh pek theih loh hun awm thei a nih avangin thisen pe theite chu hun remchang an neih mek bawhpelh lova thisen pe chhunzawm zel tum turin a fuih a ni.

Comments

Popular News (Last 30 Days)

LPG man bithliah thar