Lenkawl

Rampum-a 'Ayushman Bhava' bultanna Sewa Pakhwada denchhena Golden Card siamna hun hawn tura lo ruahman tawh chu Golden Card siamna Software (Portal) lam a la that theih loh avangin siam theih a ni dawn rih lo tih Health Department hotute chuan an sawi a, a siam theih hunah la in hriattir leh tur a nih thu an sawi bawk.

Mizoram sawrkar Health & Family Welfare Department chuan Mizoram District 5-a Primary Health Centre (PHC) paruk chu Community Health Centre (CHC)-ah hlangkaiin heng zingah hian Serchhip District atangin North Vanlaiphai PHC chu a tel a ni.

Mizoram Ex-Servicemen Association hnuaia Mizoram Veteran Multipurpose Cooperative Society chuan Manipur unaute tanpui nan nimin khan Central YMA kutah cheng nuai thum (3) an hlan a, September ni 14 khan Aizawl Hrang-khawl Welfare atangin Rs. 15,000 leh Hrangkhawl Welfare, Kamalacherra (Tripura) atangin Rs. 49,000 an dawng bawk a ni. Central YMA hruaitute chuan Manipur-a Zo hnahthlak unauten harsatna an tawhna ah khawvel hmun hrang hranga Zohnahthlak unauten kan ngaihsakna leh tuarpuina kan lantir thin chu ropui an tih thu sawiin, mipui tanrualna ah lawmthu an sawi bawk.

Lunglei atanga Tlabung panna kawng, NH. 302 chu a chhiat avanga lirthei an tlan mumal loh avangin Tlabung leh a chhehvel khua ten nitin mamawh lakluh kawngah harsatna an tawk mek.

Tun thla ni 9-a Siaha District Jail atanga tang tlanchhuak, tun thla ni 15-a Centrak Jail-a tang kan tura a kal an man leh hemi ni vek-a Aizawl Zonuam Police Out-post kawt atanga tlanchhuak leh Vanrampana (24), Meisatla, Siaha chu nimin chhun khan Aizawl Vaivakawn huamchhung, Rang-vamual hnaih ah man a ni a, thuneitu ten an kawl mek a ni. Vanrampana hian an man leh hma, niminpiah khan Aizawl Kanan Veng-ah chenna In pakhat rawkin Scooter chabi lain a tlanbopui a, khawtlang in zawngin an man zui ta a ni.

Nimin khan Kolasib-ah District Bawrhsap John LT. Sanga hovin an District-a Bank hrang hrangte hmalak dan thlirletna hun hman a ni a, he hunah hian kumin-a Quarter hmasa ber, April to June chhunga Bank te hmalak dan tarlan niin CD Ratio chu 63.49% a nih thu leh National benchmark chu khum mah se CD Ratio tha lehzual a awm theih nan Bank-te chuan tan la se an ti a. Rs. 2000/- note hnuhkir a nih dawn avangin tun thla chhungin Bank-ah dahluh leh thleng theih a nih thu tarlan a ni bawk.

Darlawn Joint VC te buatsaih Darlawn Community Health Centre (CHC) lawmna chu nimin khan Darlawn Joint VC Hall-ah neih niin he hun hi bialtu MLA leh Education Minister Lalchhan-dama Ralte chuan a hmanpui a. Minister chuan Darlan PHC chu CHC-ah hlankai a nih thu hi sawiin, sawrkarin CHC a hlankai hi a tihpuitlinna tur kawng a zawh dawn tih a sawi a, thawklehkhata damdawi In mamawh neih nghal thut a theih loh tih pawh sawiin, “A tahtawlin a lo kal zel dawn a ni,” a ti bawk.

Environment, Forests & Climate Change (EF&CC) Department hmalaknain Champhai District Mizoram Journalists' Association (MJA) Member pakua leh Information & Public Relations Department Official mi 3 te chu Sikkim- ah Press Study Tour neiin an kal dawn a, nimin khan EF&CC Minister TJ. Lalnuntluanga chuan Cham-phai atangin a vailiam a ni. He Press Tour-a kal te hian tun thla ni 20-ah Gangtok thlengin ICAR-National Research Centre for Orchids te, Sikkim Himalayan Zoological Park te, GB Pant National Institute of Himalayan Institute (Nature Learning Centre and Orchidarium) leh Kanchendzonga National Park te an tlawh dawn a ni.

Art & Culture Minister R. Lalzirliana chuan nimin khan Aizawl Vanapa Hall-ah Govt. Aizawl North College ten 34th Annual College Week kharna hun an hman chu khuallian nia hmanpuiin Mizo thalaite chu mahni hnam zia chi hrang hrang hluta ngaihsan nachang hre turin a chah a. Khawvel hnampui zawk leh upa zawkte chuan an Culture an ngaipawimawh em em tih sawiin, “Mahni hnam rohlute ngaipawimawh lo apiang chu chimralin an awm thin,” a ti a. Education leh Culture chu thil kalkawp tlat a nih avangin Education tluantling chuan Culture lam zirna a keng tel ngei ngei a, chutiang bawkin Culture chu an tui-a an zir loh chuan zawi zawiin a bo mai thin tih a sawi bawk.

Assam sawrkar chuan tunhnai khan ramri buai chingfel tura Aizawl-a Minister te inbiak chhunzawm tura rawtna chu Home Department hotute hnenah an rawn thlen a, tunkar chho hian harsatna a awm loh chuan chhanlet hman beisei a ni.