North Vanlaiphai PHC chu CHC-a hlankai zingah a tel

Mizoram sawrkar Health & Family Welfare Department chuan Mizoram District 5-a Primary Health Centre (PHC) paruk chu Community Health Centre (CHC)-ah hlangkaiin heng zingah hian Serchhip District atangin North Vanlaiphai PHC chu a tel a ni.

Mizoram sawrkar Health & Family Welfare Department-a Principal Secretary chuan tun thla ni 14 khan hemi chungchangah hian Notification a tichhuak a, Serchhip District-a North Vanlaiphai PHC bakah hian Aizawl District-a Darlawn PHC te; Kolasib District-a Kawnpui PHC te, Mamit District-a West Phaileng PHC leh Lawngtlai District-a Sangau PHC leh Bung-tlang South PHC te chu CHC-ah hian hlankai an ni.

Serchhip District-a Health Department hotute chuan tun dinhmunah Serchhip District-ah hian PHC panga (5) leh CHC pakhat (1) a awm mek thu sawiin, North Vanlaiphai PHC chu CHC-a hlankai a nih chuan Serchhip District-ah CHC pahnih, Thenzawl leh North Vanlaiphai CHC a awm dawn ta tihna a nih thu an sawi a. PHC 5 awm thin pawh 4 a nih dawn tak thu leh heng te hi Chhingchhip, Ngentiang, East Lungdar leh Khawlailung PHC te an an ni tih an sawi.

PHC hrang hrangah hian thawktu leh Khum awm zat a inang lo tih Health Department hotute chuan sawiin, a tlangpuiin PHC-ah hian khum 10 te a awm thu an sawi a. CHC-ah te hian Khum 30 a awm thung tih sawiin, PHC aiin thawktu pawh tam zawk awm tur a nih thu leh an hnathawh theih pawh tam zawk tura ngaih a nih thu an sawi a ni.