Assam in inbiakna chhunzawm a rawt

Assam sawrkar chuan tunhnai khan ramri buai chingfel tura Aizawl-a Minister te inbiak chhunzawm tura rawtna chu Home Department hotute hnenah an rawn thlen a, tunkar chho hian harsatna a awm loh chuan chhanlet hman beisei a ni.

Assam sawrkar hian Aizawl-a Minister te inbiaknaah hian ramri buai chinfel dan tur ruangam sawiho leh State pahnih aiawhte telna 'Regional Committee' din rawtna an rawn thlen tel a. Mizoram sawrkar lam chuan Assam sawrkarin an ram anga an ngaih khaw 62-te chu Mizoram chhung ami ngei a ni ti a an dinna an tarlan Assam sawrkar hnena an thehluh tawh chu Official-te'n kimchang takin sawiho phawt se tih chu an ngaihdan a ni a. Hemi chungchang hi kimchang taka sawiho a nih hnu-ah chauh State pahnih Minister-te inbiak nise tih chu an duhdan a ni bawk a. Chuvangin thuneitu sang zawk hnenah hemi chungchang hi thlen a ni a, an thutlukna nghah mek a ni.