Nitin mamawh lakluhna ah Tlabung in harsatna tawk

Lunglei atanga Tlabung panna kawng, NH. 302 chu a chhiat avanga lirthei an tlan mumal loh avangin Tlabung leh a chhehvel khua ten nitin mamawh lakluh kawngah harsatna an tawk mek.

Lunglei leh Tlabung inkar kawng hi lirthei tana zawh harsa khawpa a diak leh nal avangin tun dinhmun ah lirthei zawng zawng deuhthaw an tlan ngam tawh lova, khualzin phur Maxi Cab phei chu kumin July ni 24 atang khan a tlan mumal tawh lovin service pangngai an titawp tawh a. A tulna avanga bungraw phura tura tlan pik-up pawh tlan duh an awm meuh tawh loh avangin Tlabung-ah hian ni tin mamawh chi hrang hrang lei tur a awm tawh lo tan a, mipuite harsatna tawh hi sutkian a nih theihna tura Khawthlangtuipui Group YMA Monitoring Committee for NH 302-in an ngenna chu Lunglei Bawrhsap Ramdinliani leh NHIDCL hotuten tih hlawhtlin sakin, mipui mamawh eichawp phurh nan BRN Infrastructures Pvt. Ltd. lirthei ruahman a ni. 

KM 95 vela thui Lunglei leh Tlabung inkar kawng hi kawngpui a that lai chuan darkar 5 vel tlan a ni thin a, tun dinhmunah chuan a kaltluang pawl pawhin darkar 24 chuang hun an hman a ngai tawh nia thudawn niin tun tuma mipui mamawh phurtu lirthei pawh hian Zirtawpni khan Lunglei chhuahsanin Pathianni-ah Tlabung a thleng a ni.