Lenkawl

Serchhip Field Veng Village Council-a Seat ruak pakhat (General Seat) hnawhkhahna atana bye-election neih tur inbuatsaihna atana Electoral Roll ennawn hna chu zawhfel niin nimin khan Final Electoral Roll tarchhuah a ni.

Serchhip District Football Association in a buatsaih ‘Season Ending Tournament 2023’ chu naktuk-ah khelh tan tura ruahmanna siam a ni a, hei hi Division Screening atan hman a ni dawn ta lo thung a ni.

Zoram People’s Movement (ZPM) Party Nomination Committee chuan kumin Assembly inthlanpui neih tura Mizoram Assembly bial 40 zinga bial 39-a an Candidate tur an ruat fel ta a, Serchhip bial-ah MLA nilai leh ZPM Leader Lalduhoma chu ding tura ruat a ni.

Mizoram sawrkar in Mizoram Information Service (MIS) te awmna hmun a siksawi angin Serchhip DIPRO kalchhuak tur K. Saitluanga, Deputy Director I&PR chuan Serchhip DIPRO thar tur Lalnunmawii hnenah Vawiin hian Serchhip DIPRO mawhphurhna a hlan dawn a, K. Saitluanga hian Press Information Officer (PIO) to Chief Minister hna a chelh dawn a ni. Serchhip DIPRO kalchhuak tur K. Saitluanga hi nimin khan Serchhip Officer's Club (SOC) leh Mizo Zaimi Inzawmkhawm (MZI) Hqrs. Serchhip te chuan an thlah a ni.

Mizoram sawrkar chuan kumin-a India Independence Day lawmna neih turah Mizoram khawpui hrang hranga Minister leh sawrkar mi pawimawh ten an hmanpui dan tur a ruahman a, District khawpui tinah Minister/MLA te kalin Civil Sub-Division thuthmun-ah chuan SDO (Civil) ten Hnam Puanzar an pawtparh dawn a ni. Sawrkar in ruahmanna a siam ang chuan Serchhip-ah chuan School Education Minister Lalchhandama Ralte chuan he ni hi a rawn hmanpui dawn a ni.

Excise & Narcotics Department chhinchhiah danin kumin chhungin Mizoram-ah ruihhlo hmansual vangin mi 43 an thi tawh a, heng te hi mipa 36 leh hmeichhia 7 niin heng zinga a tam ber chu Heroin No. 4 hmangsual an ni. Excise Department chuan kum 1984 atang khan ruihhlo hmansual vanga thi hi chhinchhiahin tun thlengin mi 1779 an thi tawh a, Damdawi hmansual avanga thi te zingah hian proxyvon vanga thi mi 1161 awmin, Heroin vanga thi 233 an awm bawk a ni.

Nimin khan Hnahthial-ah District Bawrh-sap R. Lalremsanga hovin Assembly inthlanpui neih tur inbuatsaihna atan Vulnerablility Mapping and Identification of Critical Polling Stations chungchang sawihona neih a ni a, an District chhunga Polling Station siam thar pathum nen tun dinhmun ah Polling Station 27 a awm mek thu tarlan niin heng zingah hian venhimna uluk ngai bik, Vulnerable leh Critical Polling Stations a awm loh thu he hunah hian tarlan a ni.

Mipui ten man tlawm zawka Chana Dal an lei theihna tur 'Bharat Dal' chu sawrkar laipui in a tlangzarh a, Consumer Affairs, Food and Public Distribution Minister Piyush Goyal chuan he hmalakna hnuaiah hian Chana Dal kg. 1 man chu Rs. 60 anih thu leh kg. 30 chinah kg. khat chu Rs. 55 a nih tur thu a sawi a. 'Bharat Dal' hian nasa zawka ram mipuite ei leh in senso a chhawk zangkhai rin a ni. 

Lawngtlai District Chamdur P-a Village Council leh NGO te chuan thuchhuah intawm siamin ralthuam man chungchang ah Assam Rifles leh Police te chu an khua tihmingchhetu ah an puh a, tun thla ni 17-a Chamdur P-a lei laihkhuar-a Gelatine, Detonator leh Silaimu an man thu an thehdarh chu an chhui chian thu leh Sipai pawh thil awmdan an zawhfiah thu tarlangin, Sipai lam chuan July 16 zan khan Saibawh leh Vathuampui inkar, PWD Kawng Chamdur ‘P’ peng-ah mi pakhat manin, a bag an enfiah laiin a tlanbo thu an sawi a, tihngaihna an hriatloh vangin leilaihkhuara ralthuam man angin thu an thehdarh niin he an thuchhuah ah hian an tarlang a. Hetianga thu dik tawklo hmanga an khua tih hmingchhiat a ni chu pawi an tih thu leh tun hnuah thleng tawh lo se an duh thu an tarlang bawk.

Vairengte leh Sairang inkar National Highway siam hna thawh tur atana ram lak tur chung-changa sawiho ngai hrang hrangte chu nimin khan Chief Minister Zoramthanga hovin CM Conference Hall-ah sawiho a ni a, he hunah hian NHIDCL in Vairengte leh Sairang inkara 4-lane kawng siam hna an thawh tan theihna tura harsatna awm thenkhat leh sutkian a nih theih dan te sawiho a ni a. Stakeholder hrang hrang te'n an ngaihdan leh harsatna tawhte sawiin, NHIDCL lamin clearance an neih theih nan a dilna an lo thehluh tawh hrang hrangte thlirho a ni a, hna thawh thuai an beisei thu an sawi hlawm a ni.