Naktuk-ah Football khel dawn

Serchhip District Football Association in a buatsaih ‘Season Ending Tournament 2023’ chu naktuk-ah khelh tan tura ruahmanna siam a ni a, hei hi Division Screening atan hman a ni dawn ta lo thung a ni.
SDFA in Season Ending Tournament a buatsaih tur hi tunkar Thawhtanni-a khelh tan turin ruahmanna siam ni tawh mah se Match Official lamah harsatna a awm avangin tan hun hi sawn a lo ni tawh a, hei mai bakah hian 1st Division-a awm Club pariat te zingah Club 7 ten kumin a District Championship khelh a nih tuma hremna tuar, Hmar Veng FC te khelh tir ve an nih chungchangah thilphut an neih avangin harsatna a thleng leh a, nimin khan inremna tur siamin he Tournament hi naktuk, July 20, 2023-ah khelh tan a ni dawn a, Fixture pawh tihchhuah thuai tum a ni bawk.

Thudawn danin kumin kumtir lama SD-FA buatsaih, District Football Championship Final khelh a nih khan Final-ah buaina tenau deuh chhuakin a hnuah Ground-a bungrua te tihchhiat a nih avangin Hmar Veng FC te hi SDFA/MFA buatsaih Tournament vawi khat khel thei lo tura hrem an ni a. Tun tuma Tournament buatsaih tur hi Screening Tournament a nih avangin Hmar Veng FC te hi khelh phalsak niin Tournament lo awm leh turah hremna hi pek tura ruahman a ni ta zawk a ni.

Hetianga hremna kalpui hi SDFA hnuaia 1st Division Club dang 7 te chuan duh lovin an thukhawm ve thung a, Hmar Veng FC hremna chu Tournament hmasa ber ah kenkawh duhin tun tuma Tournament neih tur pawh Screening atan hman loh mai se an ti ve thung a. SDFA chuan uluk taka an ngaihtuah hnuah Season Ending Tournament an neih tur, Division Screening atana hmang tura a rel tawh chu hmang lovin Tournament pangngaia khelh zawk nise an ti a. Season hmasa a Club Registration siam angin khelh tur a ni dawn bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man