Serchhip Field Veng VC Electoral Roll tarchhuak
Serchhip Field Veng VC Electoral Roll thar hi Serchhip District Election Officer (DEO) mawhphurhna la mektu Addl. DC James Lalnithanga chuan Serchhip DC Meeting Hall-ah tlangzarhin Serchhip Election Officer Lalrinsanga Hnamte chuan Electoral Roll ennawn hna an thawh dan leh Electoral Roll thar dinhmun a tarlang a. Serchhip Field Veng VC Electoral Roll tlangzarh takah hian In 215 awmin Vote nei thei mipa 299 leh Hmeichhia 346, an vaiin 645 an awm a. Draft Roll tarchhuah a nih hnuah hming paih tura dilna lut 193 awmin hming thun thar dilna lut 8 a awm bawk a ni. Electoral Roll tlangzarh tak hi siamthat ngai hria leh sawisel duh neite tan ni thum (3) chhung; July ni 21, 2023 thlengin ziaka thehluhna hun hawn zui leh a ni bawk.
Election Office-a hotute chuan hetianga Electoral Roll thar tarchhuah a nih tak avang hian Serchhip Field Veng VC-a bye-election buatsaih tur hian an inpeih ta tih sawiin, inthlanna neih hun tur erawh State Election Commission (SEC) ruat tur a nih thu leh tun thlengin ruat fel ala nih loh thu an sawi a. Kumin ah Mizoram in Assembly inthlanpui a hmachhawn dawn avangin inthlanna hi kumthar lamah pawh neih a ni zawk mai thei niin an sawi bawk.
Tarlan tawh angin Serchhip Field Veng VC-ah hian General Seat luahtu Member pakhat chu a boral avangin Seat ruak pakhat a awm a, Seat 5 awmna Serchhip Field Veng VC-ah hian MNF in Seat 3 nei mekin ZPM chuan seat khat an nei mek bawk a ni.
Nimin-a Serchhip Field Veng VC Electoral Roll thar tarchhuah a nih rual hian Political Party hrang hrang te hnenah Electoral Roll thar hi pekchhuah nghal a ni bawk.
Comments
Post a Comment