Lenkawl

Nimin zinga Serchhip Bukpui leh Chhiahtlang Chhim Veng inkara Lalsangzuala (31), Mission Vengthlang thihna kaihhnawih a mawhphurtu nia rinhlelh Laldinthara (42), Khawruhlian nia inchhal chu Vawiin khan Police ten Aizawl-ah an man a. Thudawn danin Laldinthara hian nimin zing khan Aizawl pan tur Maxi Cab chu Chhiahtlang leh Lamchhip inkar ramhnuai ah lo pharin Aizawl a pan a, a khawsak zia ah rinhlelh a nih avangin Serchhip Police Special Investigation Team te chuan Serchhip Police Station OC Inspr. VL. Ramhluna hovin man tumin Vawiin khan Aizawl an pan ve nghal a, Aizawl Police te nen tangtlangin an man ta nia thudawn a ni a, Police te hmaah a inpuang tawh nia thudawn a ni bawk. Amah hi tunhnaiah pawh Serchhip-ah thubuai tenau a man nia thudawn niin amaherawh chu thubuai siam zui lovin chhuah leh a ni nia thudawn a ni bawk.

Nimin zing khan Serchhip Bukpui leh Chhiahtlang Chhim Veng inkar kawngthlang ah ruang pakhat hmuh niin NH. 54 siam hna enkawltu NHIDCL hnuaia Computer Operator hna thawk mek Lalsangzuala ruang a ni tih finfiah a ni a, a ruang hi enfiah a nih hnuah nimin tlai khan an chenna Aizawl Mission Vengthlang-ah vui tura lak a ni.

Serchhip khawpui chawmtu Electric Transformer thlakna tur khawl lian zawk chu Serchhip rawn thlenpui niin chawlhkar hnih (2) hnu velah hman theih beisei a ni.

Serchhip-a Excise & Narcotics Department-a thawktute chuan nizan hmasa dar 9:50 vel khan Serchhip Chhim Veng-ah Heroin No. 4 nia hriat gram 12.58 a rit chu an man a, a neitu nia hriat Laltanpuia (38), Serchhip Chhim Veng nia insawi pawh manin thubuai siam sak nghal a ni bawk.

Nimin thleng khan Serchhip District-ah COVID-19 hri kai enkawllai mi 9 an awm mek.

Tunhnaia Manipur-a tualchhung buaina thleng avanga Mizoram-a raltlan rawn lut chu nimin thleng khan mi 6932 an tling tawh a, an zingah hian Serchhip District-a rawn raltlan mi 14 an awm a ni. Serchhip District chhunga heng raltlan rawn lut zinga mi 4 te chu Serchhip khawpui chhung P&E Veng-a rawn raltlan niin Thing-kangphai-a khawsa thin an ni a, midang 10 te hi Thenzawl a raltlan niin S. Munnuam khua mi 7 leh Lingsiphai mi 3 niin raltlan zinga mi 6 te hi kum 18 hnuailam an ni bawk.

Tunhnaiah Serchhip khawchhungah Vawk damlo engemaw zat an awm avangin Vawk lakluh leh thawnchhuah khuahkhirhna siam a ni.

Mizoram Board of School Education (MBSE) chuan tun thla ni 19 (Zirtawpni) khian kumin a pawl 12 zirlaite tana HSSLC Exam result tihchhuah a tum a, result hi www.mbse.edu.in leh www.mbseonline.com-ah te hian en theihin a awm anga, a duh tan a bu lei theih a nih dawn bakah Mobile Phone No. 9863883041 leh 9863722521-ah te zawh theih a ni bawk ang.

Kumin (2023)-a Chapchar Kut Souvenir ‘Nghilhloh Bu’ tih chu nimin khan Chief Minister Zoramthanga chuan a Office-ah a tlangzarh a, kumin-a Chapchar Kut Post Souvenir ah hian thuziak 13 (Mizo leh English) bakah report leh Kut hmanna thlalak hrang hrang dah a ni. Souvenir tlangzarh a nih hnu hian Kut lawm dan thlirletna neih chhunzawm a ni bawk.

Bible Society of India (BSI) Aizawl Auxiliary chuan kum kalta khan an target chu Rs. 85,00,707 in an khum. BSI Aizawl Auxiliary thawktute sawi danin nikum April 2022 atanga kumin March 2023 chhunga an target chu Rs. 3,56,28,000 a nih laiin an sum hmuh tlingkhawm chu Rs. 4,41,28,707 a tling a, an target hi cheng nuai 85 chuangin an khum thei a ni. Nikum chhung vek khan Bible Society of India Aizawl Auxiliary chuan Bible Inpui sakna atana thawh-lawm an dawn zat chu Rs. 2,55,29,674 a tling bawk. Bible Society of India, Aizawl Auxiliary hnuaiah hian branch 56 a awm mek a ni.