Serchhip khawpui chawmna tur Electric Transformer lian Serchhip rawn thlenpui a ni
Serchhip Power Division-a Sr. Executive Engineer (EE) Er. Laldawngliana chuan he Transformer thar, 6.3MVA hi nizan hmasa khan Serchhip rawn thlenpui a nih thu leh nimin khan hlantlak fel a nih thu a sawi a, Er. Laldawngliana chuan Serchhip hian 132kV line hmanga Power a dawn thin thu leh hei hi 2.5MVA Transformer pahnih hmangin mipuite hman theih turin Serchhip-ah sem darh a nih thu a sawi a. Heng 2.5MVA Transformer pahnih hmang hian kum 20 chuang mipuite hnenah kawlphetha pek hna hi kalpui a nih tawh thu sawiin, Transformer pakhat zawk hian Serchhip Vengpui lam leh Lungpho tlangdung bakah PHE Tui pump-na te chawmin pakhat zawk hian New Serchhip, Chhiahtlang leh Keitum te a chawm bawk tih a sawi a. Tuna khawl rawn thleng thar hi 6.3MVA a nih thu leh cheng nuai 87.38 man vel a nih thu sawiin, tuna khawl thar an hmang thei a nih chuan kawlphetha inpek chhawk ngai thin tam tak chu sutkian theih a nih an beisei thu a sawi bawk a ni.
P&E Department-a thawktute chuan tuna khawl an hmanlai pakhat hmang hian New Serchhip Area-ah Eng pein kawl thar leh lian zawk hmang hian Serchhip Vengpui lam bakah Chhiahtlang leh PHE Tui Pump-na bakah khaw chhehvel pawh pe se harsatna thleng lo tura an beisei thu an sawi a, he khawl hmang tur hian hma an lak nghal dawn thu leh harsatna dang a awm a nih loh chuan chawlhkar hnih chhungin an inpeih theih an beisei thu an sawi bawk a ni.
Serchhip District in kawlphetha a mamawh hi a san lai berin MW 9 vel a nih thu P&E Department hotute chuan sawiin, heng zinga a zatve aia tam mah chu Serchhip khawpui chhunga hman a nih thu an sawi a, hei bakah hian Chhingchhip Sub-Station atanga an pek chu Baktawng leh a chhehvel khua ten Industry atan an hman nasat bawk thu an sawi a bawk a. Tunah hian Thenzawl-ah nizung chakna hmanga kawlphetha MW 10 pechhuak thei tur siam tuma ruahmanna an neih mek thu pawh sawiin, a ram chungchangah VC te nen inremna te siamin a hmunhma hi buaipui mek a nih thu an sawi a, a hmunhma te hi Department hotute nen la enfiah leh tur a nih thu an sawi bawk a ni.
Comments
Post a Comment