Bukpui leh Chhiahtlang inkar-ah inthahna a thleng; Police ten SIT dinin an chhui zui nghal

Nimin zing khan Serchhip Bukpui leh Chhiahtlang Chhim Veng inkar kawngthlang ah ruang pakhat hmuh niin NH. 54 siam hna enkawltu NHIDCL hnuaia Computer Operator hna thawk mek Lalsangzuala ruang a ni tih finfiah a ni a, a ruang hi enfiah a nih hnuah nimin tlai khan an chenna Aizawl Mission Vengthlang-ah vui tura lak a ni.

Thudawn danin nimin zing dar 5:00 vel khan Chhiahtlang Chhim Veng-a nupa pakhat chu Bukpui ram-ah feh tura kalin Chhiahtlang Chhim Veng leh Bukpui inkar, NH. 54-a thisen nasa taka bua chu hmuin an enfiah hnuah kawngthlang ft. 40 vela hla-ah ruang ni ngeia hriat chu an hmu bawk a, YMA hruaitute hriattir nghalin anni hian Police te an hriattir leh hnuah he thil thlenna hmun hi enfiah niin he ruang hi NHIDCL hnuaia Computer Operator Lalsangzuala (31), Aizawl Mission Vengthlang a mi ruang a ni tih finfiah a ni. Ruang hi Police ten enfiahin Aizawl atangin Forensic lama mithiam te chah nghal an ni bawk a, anni pawh hian nimin chawhma lam khan he thil thlenna hmun hi thlengin an enfiah nghal a, nimin chhun khan ruang hi Serchhip Damdawi In-ah Postmortem tura lak zui niin tihtur tul ang ang te tihfel a nih hnuah Lalsangzuala chenna, Mission Vengthlang-ah vui turin nimin tlai khan a ruang hi lak a ni.

Lalsangzuala hi mi kut tura boral ngei niin a lang a, a taksa ah kutthlakna hnuhma awmin a hmai lamah nasa taka kutthlak niin a lang bawk a, he thil thlenna hmun hi tunhma lama Bukpui M/S awmna thin zawn vel NH. 54 niin kawngpui lai-ah thisen buakna hnuhma hmuh tur tam tak a awm bawk a, pawikhawihtute hian nasa taka kut an thlak hnuah a ruang hi kawngthlang lamah hian an theh thla niin a lang a, he pawikhawihna chhui tur hian Serchhip SDPO Kaste Romalsawma kaihhruaina hnuaiah Special Investigation Team (SIT) chu nimin vek khan din nghal niin Social Media lama mi pahnih man anga thlalak thehdarh chu thu dik lo a nih thu Serchhip Police hotute chuan an sawi bawk.

Thudawn danin Lalsangzuala hi NHIDCL hnuaia thawk niin an Camp-a khawsa thin a ni a, a Motor (Bolero) chu Company lam hian man chawia hman sak bawkin, niminpiah khan Company lam Motor hmang hian Aizawl atangin a rawn chho a, Chhiahtlang dai hmarlam Thinghmunkawn-a KRAM Company hmun thlengin heta tang hian a Motor hian an driver, Lalramtluanga (Chhiahtlang Chhim Veng) chuan a va lam a, an In-ah zanriah te eiin an mi nghal a, Lalramtluanga hian zanlai vel-a a harh chuan Lalsangzuala hi a lo mu tawh lo niin a sawi a. A Motor pawh hi nimin vek khan Chhiahtlang Chhim Veng YMA Run zawn kawngpui kam-a mi Thingkhawn su-a hmuh niin Police te hian an enfiah bawk a ni.