Thenzawl-ah Heroin Hawng 7 zet man a ni
Serchhip-a Excise & Narcotics Department-a thawktute chuan nimin khan Serchhip District chhunga Thenzawl khua ah Heroin No. 4 Hawng 7 zet an man.
Posts
South Zone leh North Zone M/S Sports nei tan
Hripui leng avanga Middle School Zonal Sports neih mumal theih a nih loh hnuah nimin atang khan Serchhip South Zone leh Serchhip North Zone Middle School Sports chu neih tan a ni.
MCPA in Pension Rules zirho
Mizoram Civil Pensioners’ Association (MCPA) District Hqrs. Serchhip chuan nimin khan ‘Pension Rules’ zirhona an nei.
NSS Calendar tlangzarh
Govt. Serchhip College NSS Unit buatsaih ‘NSS Calendar 2023’ chu nimin khan Govt. Serchhip College Principal K. Laldinpuii chuan a tlangzarh.
Hri kai enkawllai 5 awm
Niminpiah khan Mizoram-ah Sample 60 enfiah leh niin heng atang hian COVID-19 hri kai hmuhchhuah an awm lova, nimin khan hri kai enkawl zinga mi pakhat chu enkawlna hmun atanga chhuahtir a ni. Heti hian nimin tlai thleng khan Mizoram-ah COVID-19 hri kai enkawllai mi 5 la awmin hri kai hmuhchhuah atanga za zela 99.69 enkawl dam an ni tawh a, hri kai te zingah mi 726 an boral tawh a ni.
ZPM Chhung Inkhawm nei
ZPM Party chuan nimin khan Aizawl-a an party Office-ah Chhung Inkhawm neiin he huna thu sawitu ZPM General Secretary (Vigilance) SL. Ngursailova chuan sum kan thawhchhuah a ngai tih sawiin, “Central-a sum sawichhuak thei ram hruaitu neih aiin, kan State chhung atang ngeia thawkchhuak thei ram hruaitu kan ramin a mamawh,” tiin tuna kan thawhchhuah chu Budget atangin 10% pawh a tling lo niin a sawi.
Kolasib MJA te zinchhuak
Kolasib District-a MJA Member mi 7 te chuan Agriculture leh Horticulture hmunhma te bakah NEIGRIHMS leh hmun pawimawh dang te tlawh turin nimin khan ‘Meghalaya Press Tour’ an nei tan a, Kolasib DIPRO Hmingthanzuala chuan ho in Kolasib DC John LT. Sanga chuan nimin zing khan a vailiam a ni.
Mau tangkaina sawipui
Mizoram State Planning Board Vice Chairman H. Rammawi chuan Numaligarh Refinery Limited hotu Nikunja Borthakur chu Zirtawpni khan Guwahati-ah hmuin Mizoram a Mau hman tangkai dan a sawipui a, Numaligarh Refinery Limited-ah hian Mau atangin Ethenol Oil siam-chhuah a ni. Mizoram State Planning Board Vice Chairman hian Ethenol Oil te Mizoram Mau atanga siamchhuah a nih theih nan thawhpui ah sawmin Chief Minister hova ngaihtuah chhunzawm turin hmalak tum a nih thu a sawi. Planning Bord Vice Chairman hian nimin khan NEC Secretary Moses Chalai chu Shillong-ah hmuin Mizoram Project hrang hrangte a sawipui bawk a ni.
‘Bawrhsap Click’ hawng
India khua leh tui te tana sawrkar laipuiin Scheme tha tak tak leh Service hrang hrang Common Service Center (CSC) atanga pekchhuah theih te mipuiin nasa zawka an hriata, an hman tangkai nghal theihna atana hmalakna runpui ‘Bawrhsap Click’ programme chu nimin khan Aizawl District Bawrhsap Dr. Lalhriatzuali Ralte chuan Aadhaar Seva Kendra, Bethlehem Veng-thlang-ah a hawng a, Bawrhsap click hi Common Service Center atanga Service hrang hrangte mipuiten nasa zawka an hman tangkai theihna tura beihpui thlakna programme hming niin Veng/Khua leh institution hrang hrangah te hmalakna neih chhoh tur a ni dawn a, First Phase-ah Aizawl Veng thlan bik leh Institution thlan bikah te neih phawt tura ruahman a ni.
State Level Kala Utsav 2022 neih a ni
Mizoram Samagra Shiksha buatsaih hnam ziarang hmanga Zirlaite intihsiakna, State Level Kala Utsav 2022 chu nimin khan Aizawl Chanmari YMA Hall-ah neih a ni.