State Level Kala Utsav 2022 neih a ni

Mizoram Samagra Shiksha buatsaih hnam ziarang hmanga Zirlaite intihsiakna, State Level Kala Utsav 2022 chu nimin khan Aizawl Chanmari YMA Hall-ah neih a ni.

State Level Kala Utsav 2022 hi Mizoram Samagra Shiksha State Project Director Lalhmachhuana chuan hmanpuiin NEP 2020 ang chuan hnam zai leh lam te chu zirlai peng pakhat a ni tawh a, ngaih pawimawh a hlawh tulh tulh a ni, a ti a. Zirlaite chu an kal zelna turah hnam zia ngai pawimawh zel tur leh National Level-a kal turte chu lawmman la thei ngei turin duhsakna a hlan a ni.

Kumin Kala Utsav-ah hian District Level-ah Govt. School 47, Govt. Aided 7 leh Private School 7 atangin zirlai 403 an tel a. State Level-ah hian District tin aiawh zirlai 103 an tel a. Heng zing atang hian National Level-a kal tur thlan an ni a. National Level Kala Utsav-ah hian Mizoram in lawmman a lo dawng tawh thin a, kum 2021 pawh khan Visual Art 3D-ah lawmman pakhatna a lo dawng tawh a ni. Kumin-a Kala Utsav-ah hian Artform hrang hrang - Vocal music classical leh Traditional Folk, Instrumental Music Melodic leh Purcussive, Dance Classical leh Folk, Drama (solo acting), Visual Arts 2D leh 3D, Indigenous Toys & Games-ah te intihsiak a ni a. Artform tinah hian mipa leh hmeichhia a hrang zela intihsiakin National-a kal turte hi mi 19 an ni a, January 3-7, 2022 chhungin RIE Bhubaneswar Odisha-ah National Level Kala Utsav hi neih a ni ang.