South Zone leh North Zone M/S Sports nei tan

Hripui leng avanga Middle School Zonal Sports neih mumal theih a nih loh hnuah nimin atang khan Serchhip South Zone leh Serchhip North Zone Middle School Sports chu neih tan a ni.
Serchhip South Zone Middle Sports hi nimin khan Serchhip Sports Complex-ah neih tan niin Govt. M/S Serchhip-a Headmistress Vanlalhruaii chuan he Sports hi a hawng a, Sport chu eizawnna tlak anih tawh thu sawiin, hlawhtling tur erawh chuan taimakna leh zuk leh hmuam, ruihtheih thil a insum theihna a pawimawh thu a sawi a. Infiami rilru pu chung leh thian tha siamna hun remchang a hmang turin zirlaite a fuih a ni.

Serchhip South Zone huamchhunga Middle School 7 atangin School 6 te chu tun tum Sports-ah hian an tel thei a, Running event, Long Jump, High Jump, Volleyball leh Football-ah te inelna neih a ni anga, tunkar chhungin he Sports hi zawhfel hman tura ruahman a ni.

Serchhip North Zone Middle School Sports pawh nimin khan Serchhip P&E Veng a Leisekawt Mual-ah neih tan a ni bawk a, he Sports hi Serchhip SDEO Vanlalchhana chuan hawngin zirlai kalkhawmte chu an zirlai ngai pawimawh ber tura chahin, Sport chu Subject pakhat anih thu a sawi a, Subject pakhat chauh a rilru zawng zawng pek a thatloh thu a sawi a. Hlim taka Sport hmang turin zirlaite duhsakna hlanin, infiammi rilru thianghlim pu turin a chah nghal bawk.

Serchhip North Zone-ah hian Middle School paruk awmin tun tum Sports-ah hian an tel kim vek a, Running event, High Jump, Long Jump, Javeline Throw, Inhruipawh, Volleyball leh Football ah te intihsiakna an nei ang a, tun thla ni 9 khian zawhfel tura ruahman a ni.