Lenkawl

Thla hmasa a ruahsur nasa avanga Serchhip Darnam Veng-a chenna In chhia, Chhanghnuna chenna In tur chu Inrinni atang khan khawtlang in hnatlang neiin an sak sak.

National Health Mission (NHM) hnuaia thawk, tiamchin awm lova a huho a chawlh la mekte chu bân an nih lohna chhan tur ziaka insawifiah tura hriattir an nih angin NHM hnuaia thawk te hian Vawiin hian a huho in insawifiahna thehluh an tum nia thudawn a ni a, an hna erawh zawm an la tum loh thu an sawi thung.

Serchhip AOC Veng-a Mizoram Synod Family Guidance & Counselling Centre (FG&CC) Counsellor Quarters sak thar chu Inrinni khan Synod Moderator Rev. Dr. Vanlalnghaka Ralte chuan a hawng.

Keitum Branch YMA chuan Inrinni khan Tuichang lui an humhalh huamchhungah Nghakuai hmanga Sangha man theih hun an hawng a, he hun hi mipuiin an hlutin khaw hrang hrang atanga kal an tam hle.

Serchhip District chhung North Mualcheng khuaa Vawk thi Sample enfiah te chuan African Swine Fever (ASF) hri an kai tih hmuh leh a ni.

ZPM Leader Lalduhoma chuan kar kalta khan Champhai District-a khaw thenkhat Champhai Kanan, Bethelkawn, Kelkang leh Dilkawn khua te tlawhin vantlang inkhawm hrang hrang ah thu a sawi a, “ZPM hi Pathian in min hruaina ah kan lawm em em a, a din tirh atangin thiktu leh ertu a nei nghal a. Sawrkar siam tûrin theih-tawpin kan tang ve a, he kan sawrkar siam tum erawh hi chu a danglam a, kan sawrkar hrawn tawh ang ni lo, party sawrkar ni lo, mipui sawrkar a ni. Mithiam rual nen hun rei tawh tak atang khan kan sawrkar huna ram kan kaihhruai dan tur kan duang a, tunah hi chuan sawrkarna siama rorel tur hian kan in peih tawh a ni,” a ti.

Mizoram Pradesh Youth Congress Committee (MPYCC) chuan Tawngtai Bethel Camping Centre (TBCC) Electric disconnect thut a nih avangin an harsatna tawhte finfiah turin Inrinni khan helai hmun hi an President Dr. Lalmalsawma hovin an tlawh tih an sawi a. Helai hmun enkawltute chuan kum 2019-a Sakawrtuichhun-a an insawn hnuah Electric pawt lutin a hma lama thla khata Rs. 2000 leh 3000 vel an chawi thin chwi tura an in ngaih laiin bill a lo san tak avangin an pe thei lo fo tih an sawi a. Thla hmasa lam khan cheng nuai 5 dawn an pek theih loh avangin disconnect tura hriattir niin Rs. 25,000/- chhunglut mah se July 16, 2022 khan Electric Connection hi tihtawp sak an ni ta tih an lo sawi a ni.

Zo-Reunification Organisation (ZORO) chuan Synod Camping Centre, Sihphir-a awm mek Myanmar rambuai avanga Mizoram a lo raltlan te chu nimin khan tlawhin Rs. 8000/- chu tanpuina atan an pe a, ZORO chuan Myanmar atanga rawn raltlan ten tanpuina an hmu ta mang lo nia sawiin, tun dinhmun ah ei leh in turah harsatna an tawk tan ta niin an sawi a, a theih anga puih zel an tum thu pawh an sawi bawk.

Synod Prison Ministry huaihawtin Inrinni khan Lawngtlai Chandmary Kohhran Hall-ah Mizoram chhunga District Jail hrang hranga Synod Rawngbawlna kalpui mekah, hmasawnna tur leh rualkhai zawka Rawngbawlna kalpui a nih theih dan tur chungchangah training neih a ni a, Jail-ah hian an thiltihsual avanga tang an awm mek laiin, an tihsual ni hauh lovah, dawta puh leh hekna avanga tang te an awm bawk a, hetiang hi a nih  avang hian. Jail rawngbawlna kalpui mekah fim-khur taka hun hman a pawimawh thu te pawh tarlan a ni bawk. District Jail Rawngbawlna hi Lawng-tlai-ah hian kum 2019 atangin kalpui tan a lo ni tawh a, Lawngtlai Pastor Bial leh Lawngtlai Chandmary Pastor Bial-a Kohhran hrang hrang ten a inchhawkin thlakhat ah Pathianni vawi hnih Programme an hmang thin a ni.

Mizoram Police chuan thuchhuah siamin tunlai hian Whatsapp-ah mi thlalak leh nihna hmanga inbumna (impersonation) a hluar hle tih sawiin, a titute hian an Profile-ah sawrkar hnathawk leh Officer emaw, kan ram hruaitute leh Minister te thlalak hmangin an hnuaia thawkte leh mi dangte biain, eng eng emaw chhuanlam siamin pawisa inthawntir turin emaw, thil leitir tumin an be thin niin an sawi a. Hetiang thil hi inbumna a ni tih hria a lo fimkhur theuh turin mipuite an ngen bakah hetiang thil tawng leh lo hria chuan cybercrime.gov.in ah emaw Cyber Helpline No. 1030-ah report turin an ngen bawk.