NHM hnuaia thawk ten insawifiahna thehlutin hna erawh chhunzawm an la tum lo thung

National Health Mission (NHM) hnuaia thawk, tiamchin awm lova a huho a chawlh la mekte chu bân an nih lohna chhan tur ziaka insawifiah tura hriattir an nih angin NHM hnuaia thawk te hian Vawiin hian a huho in insawifiahna thehluh an tum nia thudawn a ni a, an hna erawh zawm an la tum loh thu an sawi thung.

National Health Mission (NHM) Mizoram-a Mission Director Dr. Eric Zomawia chuan Inrinni khan NHM hnuaia hnathawk, a huho a chawlh la mekte chu ‘Show cause notice’ pein, July 11-13, 2022 chhung phalna nei lova Casual Lleave an lak avang leh chumi hnua Indefinite Strike NEUM-in a huaihawt thlawpa hna an zawm loh avangin Mizoram Essential Services Maintenance Act, 1990 (as amended) Section 4 & 6(1) bawhchhia an ni tih a hriattir bakah, hna-a an luh dawn a an intiam tawhna (agreement deed) para 3(3) angin bân theih leh kum khat thleng tan tir theih an nihna bakah, Rs. 2,000 chawitir theih an ni tih a hriattir a. Hei vang hian a rang thei ang bera an hna zawm tur leh an hna atanga bân an nih lohna chhan tur ziaka ni thum (3) chhunga a hnena insawifiah turin a hriattir bawk.

Hetianga insawifiah tura hriattir an nih chungchangah hian NHM Employee Union of Mizoram (NEUM) Sub-Hqrs. Serchhip hruaitute chuan Vawiin hian a huho in insawifiahna hi thehluh an tum thu LENKAWL an hrilh a, insawifiah tura chhanna hi inang tlanga ziah a nih dawn thu sawiin, NHM Staff te hian anmahni awmna theuha an hotute hnenah insawifiahna hi an thehluh tur thu leh Serchhip bikah chuan CMO leh DMS te hnenah thehlut turin chawhma dar 10:30 hian an kalkhawm dawn tih an sawi a, hetiang bawk hian hmundanga mi te pawhin an Medical Officer te hnenah insawifiahna hi an thehluh dawn thu leh thu thar a awm a nih loh chuan hna zawm erawh an la tum loh thu an sawi thung a ni.

Thudawn danin lungawilohna lantira nuar mek NHM Staff te hian insawifiahna lehkha an thehluh turah hian NEUM Executive Committee in NHM hnuaia Contract Staff zawng zawngte hamthatna tur thil chi hrang hrang ngiata sawrkar kar nan ni 3 chhung Mass Casual Leave lak a rel thu leh sawrkar nen inbiakna an neih hnuah lung-awina khawp thu an hmuh loh avangin tiamchin awm lova nawrh nise a tih bakah tun thla ni 15-a NEUM Executive Meeting in an thil duh pathum (3) sawrkar in a pawmpui theih chuan tiam chin awm lova an chawlh mek tihtawp rem an tih thu a rel te tarlangin, NEUM Member an nih avanga he thu-chhuak hi zawm an nih thu te tarlan an tum a ni.