H/S leh HSS Zirtirtu ten Question set dan zirho

Mizoram Board of School Education (MBSE) buatsaihin nimin khan Serchhip District chhunga MBSE Affiliated High School leh Higher Secondary School zirtirtute tan ‘Capacity building of Teachers in setting Higher Order Thinking Skills (HOTS) Question’ tih thupuia hmangin ni khat awh Training neih a ni.
MBSE hian HSLC Ieh HSSLC kum 2020 exam atang khan exam dan kalphung leh zawhna zawh dan thar a hmang tan a. Hemi hian a tum ber chu Content-Based Question atanga Competency-based question tam zawk zirlai naupangte tana chhawpchhuah a ni a. Hemi atan hian District 11-a zirtirtute tan ‘Question Setting Technique’ tih thupui hmangin Training buatsaih a ni tawh nghe nghe a ni.

Nimin-a training-in a tum ber chu zirtirtu, Term exam leh Board exam buatsaih thin te tan HOTS question chu eng ang nge a nih tih leh a buatsaih dan zirho a ni a. Training hi session hnihah then niin Session hmasa zawkah Bloom Taxonomy atangin Lower Order Thinking Skills (LOTS) leh HOTS question zirho a ni a. Session hnuhnung zawkah Subject hrang hrang atangin HOTS question buatsaih chhin a ni bawk.

He training-ah hian National Education Policy (NEP)-2020 chungchang te, Class IX leh X Science leh Mathematics bilingual textbook chungchang te sawi zauna hun neih nghal a nih bakah MBSE-in Scheme of Examinations and Question Design a hman mek, Integrated Evaluation Scheme (IES) leh Application Software chungchang inhrilh thar lehna neih nghal a ni bawk a. Dr. Jonathan Lalrin-mawia, Academic Officer leh Lalrinzuali Sailo, Academic Officer MBSE ten zirtirna an pe a ni.