EF&CC Minister in YMA Branch 12 te kawmin ramngaw humhalhna tur sumfai a hlan

Environment, Forest & Climate Change Minister TJ. Lalnuntluanga chuan nimin zing khan North Vanlaiphai Forest Division huamchhunga ramngaw humhalh kawnga hma la tha Branch YMA 12 hruaitute a kawm.
EF&CC Minister hian nimin zing khan North Vanlaiphai DFO Pisa-ah North Vanlaiphai Forest Division huamchhunga ramngaw humhalh tha YMA Branch 12 hruaitute kawmin, mihringten kan nunna atana kan mamawh ramngaw tha taka an lo enkawl thinnaah lawmthu hrilhin lo uar deuh deuh turin a chah a ni. Minister hian khawvelin boruak thianghlim a nei zel theih nan Carbon Credit a kalpui thin thu leh ramngaw nei tha ten sum tam tak hailuh theihna remchang an nei thin tih sawiin, hei hi Mizoram pawhin a kalpui dan tur an dap mek thu leh a hlawhtlin ngei a beisei thu a sawi a. Mizoram-ah ramngaw leh tuihna humhalhna lama hmalakna lian tak Japan International Cooperation Agency (JICA) Project hmanga kalpui an tum thu pawh tarlangin, he project hmang hian tuihna humhalh leh tihpun te, Botanical Garden tha tak tak siamte leh hetiang lam chi hmalakna hrang hrang kalpui tum a nih thu sawiin, a Project Cost pawh cheng vbc. 525 zet a nih thu a sawi bawk. 

He inkawmna hun hi North Vanlaiphai DFO C. Lalkhawthanga chuan kaihruaiin Minister hian Branch YMA 12 te hnenah Compensatory Afforestation Fund Management and Planning Authority (CAMPA) Fund atanga tanpuina Rs. 75,000/- theuh a hlan a, tanpuina dawngtu YMA Branch 12 te hi Mualcheng, Chekawn, Lungchhuan, Bualpui 'H', Khawlailung, Khawhri, Aithur, Bawktlang, Ngharchhip, Sailulak, Sialhawk leh Tlangpui Branch te an ni.

EF&CC Minister hian niminpiah khan Thenzawl Forest Division huamchhunga awm Sailam Ecological Conservation Society te enkawl ‘Sailam Bird Sanctuary’ chu a tlawh bawk a, Sailam khaw mipuiten kum 2015 atanga an lo enkawl tawh Sailam Bird Sanctuary chu a hluin a ropui hle tih sawiin, Sailam khawtlang hmalakna chu entawntlak a nih thu leh khaw dangte pawhin hetiang tih nachang hi hre zel se a duh takzet tih a sawi. Sailam in Eco-Tourism leh Botanical Garden lama theihna leh hmunhma an neihte ramngaw tichhe si lova haichhuah thiam a tha hle tih hrilhin, hemi kawnga hma la turin sawrkar pawh a inpeih reng tih a sawi bawk. Sailam Bird Sanctuary enkawl zuina atan leh tihchangtlun zel nan Minister hian CAMPA Fund atangin cheng nuai ruk a hlan nghal a ni.