MP Inthlanpui 2024-a 26-Serchhip (ST) AC-a Vote tlak dan
Posts
Serchhip District-ah tluang taka Vote thlak a ni
Lok Sabha Inthlanpui chu Serchhip District-ah pawh nimin khan tluang taka neih a ni.
Serchhip District-ah Zirlai naupangte hnenah a thlawnin Zirlaibu semchhuah mek a ni
Samagra Shiksha Serchhip District-a thawktute chuan kumin-a Zirlai naupangte hnena zirlaibu a thlawna an sem tur zinga a tam zawk chu an sem tawh thu sawiin, tunah hian sem tur engemaw zat an la kawl thu leh lehkhabu la rawn thleng lo pahnih ala awm thu an sawi.
ASF lakah fimkhul tul ti
Tunhnaiah Mizoram District thenkhat ah Vawk natna, African Swine Fever (ASF) hmuh leh niin hmun thenkhat chu ASF lenna hmun ah puan a ni leh tawh a, Serchhip DVO Dr. H. Vanlalrawna chuan tun dinhmunah Serchhip District chu ASF lakah hian a la him rih nia an hriat thu sawiin, mipuite chu Vawk leh vawksa tanga thil siam chi hrang hrang lakluh kawngah fimkhur se a duh thu a sawi a. Serchhip District-a Vawk lakluh chungchang ah hian khapna Order pawh tihchhuah leh thuai tum a nih thu a sawi bawk.
Mizoram Lok Sabha Inthlanpui ah mipuiten tluang takin Vote an thlak ta
Mizoram Lok Sabha Intlanpui 2024 chu nimin khan tluang taka neih niin thil duhawmlo liantham thleng a awm hriat a ni lo a. Kumin-a Inthlanpui ah hian Vote tla tha lutuk lovin nimin tlai dar 5:00-a Vote thlak hun khar a nih thlengin za zela 56.68 vel tlain hei ai hian Vote tla zat hi tha hret tura ngaih a ni.
Tuitla ruang hmu nghal
Keifang Police Veng-a cheng Lalngaih-awmi (18) d/o Laltlanzova chu nimin khan Tui-vawl lui-ah chesualin tui-ah a tla a, nizan khan a ruang hi hmuh a ni. Thudawn danin Lalngaih-awmi hi a thiante nen nimin khan Phullen kai Tuivawl-ah kalin chawhnu lam khan Mawnghlim li an tih chhakah chesualin tui-ah a tla a, tuitla hi zawn nghal niin nizan dar 7:30 vel khan a chetsualna atanga hla vak lo li-ah a ruang hi hmuh a ni.
Inthlanna a Duty boral
Lok Sabha Inthlanpui neih Champhai District chhung Vangchhia Polling Station-a Duty Lalrinpuia (28), Kawlkulh Workshop Veng, tuna 2nd IR Bn. a Constable chu nimin zing khan Polling Station hmuna an riahna ah lungphu chawlin a boral a, nimin vek khan a ruang hi an khua ah lak a ni. Lalrinpuia ruang hi Champhai atangin DC leh SP hova thlahin, he thil thleng hi CEO hnenah hriattir a nih thu leh ralna pawh a rang thei anga an dawn theih nan hmalak a nih tur thu DC huan a sawi.
MNF leh INC beisei a sang
MNF President leh Chief Minister hlui Zo-ramthanga chuan inthlan boruak thlirin an party Candidate K. Vanlalvena chu a tlin ngei a beisei thu nimin-a thuthar thehdarhtu ten an kawmna ah a sawi a, an party Candidate K. Vanlalvena chu Rajya Sabha MP a nih chhunga a hnathawh chu mipuiin an hria tih sawiin, Mizoram tana nasa taka hna a thawh avangin a tlin ngei a beisei tih a sawi a ni. MPCC President Lal Thanzara pawhin kumin MP inthlan chu an Party inlungrual lai tak a ni tih sawiin, Party President a nihna anga inthlan a hmachhawn hmasak berah beiseina sang tak a nei tih a sawi bawk.