Lenkawl

India rama Rubber tharchhuak hnem ber dawttu Tripura tlawha zin Mizoram-a Journalist mi 15 te chuan Aizawl an rawn thleng leh ta a, Tripura-a an cham chhung hian hmun pawimawh hrang hrang an tlawh nghal bawk a ni.

Seventh-day thalai, Adventist Youth Federation (AYF) chuan Inrinni kalta khan Global Youth Day hmangin Serchhip-ah pawh he ni pual hian thisen Unit 35 pek a ni.

Serchhip District Tennis Championship vawi 7-na chu Inrinni khan khelh zawh a ni.

Election Commission of India-in General Election to Lok Sabha, 2024 neih tur thu a puan tak avangin inthlan hun puan ni, March 16, 2024 atangin Model Code of Conduct (MCC) chu Serchhip District-ah kenkawh a lo ni ta a. Inthlan neih tur chungchanga hriat duh nei te, Model Code of Conduct chungchang hriatchian duh nei emaw, Model Code of Conduct bawhchhiatna chung-changa Complaint nei te tana hriattir theihna tur sawrkar chuan ruahmanin Model Code of Conduct Implementation and Monitoring Team-ah HD. Lalpekmawia, Project Director, DRDO chu Nodal Officer niin Ph. No. 8974189546-ah biak-pawh theih a ni a. Member-ah Daniel Sailo, SDO (Civil), North Vanlaiphai (Ph.No. 8731058236); Rebecca Laldinmawi Hrahsel, SDO (C), Then-zawl (Ph. No. 89747 36278); Marilyn Lalruatkimi, SDC Serchhip (Ph. No. 8415854261); C. Vanlalchhanhimi, SDC Serchhip (Ph. No. 9612058635) leh PB Singh, SDPO, Serchhip (Ph. No. 9856890256) te ruat an ni bawk.

Serchhip District chhunga Khumtung khua ah tunhnaiah Bekang eisual tam tak an awm nia hriat a nih avangin Health Department hnuaia Food and Drugs Administration-a Joint Director Lalsawma chuan nimin khan Khumtung khua hi a tlawh a, he khua ah hian Bekang eisual vang nia ngaih in mi 67 zet chu damdawi In-a enkawl ngaiin an awm a, an zinga mi kum khat leh thla 9-a upa Laltlansangi Zirtawpni zan khan a boral nghe nghe a ni. Khumtung khuaa Bekang ei hi enfiah turin a Sample lak a ni tawh a ni.

Mizoram in Lok Sabha Inthlanpui a hma-chhawn tur atan PC Party chuan Vawiin hian an party Candidate tur an puang dawn a, Kolasib MJA Press Club-ah an President Vanlalruata chuan an Candidate tur hi a puang ang. Tarlan tawh angin ZPM chuan he inthlana an Candidate tur hi puang tawhin Party dang zingah Candidate puang hi an la awm rih lo a ni.

Inrinni chhun lai vel khan Lawngtlai District chhung Borapansury-II Âmtuli Veng-ah kangmei chhuakin chenna In pathum chu bungrua engmah chuh hman lohin a kangral a, heng In te hi Gopal Nanda Chakma, Alo Baran Chakma leh Punyo Chandra Chakma te In niin mihring thi leh hliam an awm lo a, bungrua cheng nuai 10 man vel a kangral nia chhut a ni.

Kar kalta-a Central YMA leh Mizoram Police-ten Mizoram hmun hrang hranga hnamdang ILP neilo an enfiah tuma ILP fello an man mi 1065 zinga mi 939 chu Court a hruai niin, dan bawhchhe zingah hian naupang kumtlinglo mi 69 an awm a, dan bawhchhia nia sawi, ILP nei Court in a chhuahtir mi 66 awmin, an zinga 804 te chu thiamloh chantir an ni thung. Hetihlai hian sawrkar kum kal mekah Aizawl District-ah ILP dil mi 26,385 zet an awm tawh thung.

Mizoram Chief Electoral Officer, Madhup Vyas-a chuan Mizoram Lok Sabha inthlanpui chu thianghlim, fel, zalen, mi tin huap leh telna a nih ngei theih nan Mizoram mipuite tawiawmna a ngen tih Inrinni-a thuthar thehdarhtute a kawmna ah a sawi a. Inthlanpui lo awm turah hian State Department chuan Mizoram Liquor (Prohibition) Act 2019 chu khauh taka a kenkawh tur thu sawiin, Polling Station zawng zawngah Commission-in awm tura a tih, Assured Minimum Facilities dah vek a ni ang tih a sawi bawk. Hei bakah hian CEO chuan Postal Ballot leh Home Voting Facility chu rualbanlo leh kum upa ten an hman theih turin ruahman a ni bawk ang, a ti.

Thla thar April 19-ah Mizoram Lok Sabha Inthlanpui neih turah mipui te Vote thlakna atan Electronic Voting Machine (EVM) hman a ni leh dawn tih Mizoram CEO chuan a sawi a. He inthlanna ah hian ECIL siam Model thar ber M3–EVM/VVPAT hman a ni dawn a. Election Commission of India chuan inthlannaa hman atana daih zan tur Voter Verifiable Paper Audit Trial (VVPAT) leh Electronic Voting Machine (EVM) a rawn dah tawh a. Khawl endik hna thawh khatna zawhfel tawh niin tunah hian inthlanpuia hman tur Ballot Unit 2158, Control Unit 2195 leh VVPAT 2288 te chu District tina Strong Room-ah uluk taka venhimna hnuaiah dahthat a nih tawh thu an sawi bawk.