Posts

Latest News

MNF Joint Meeting nei

Image
Serchhip West Block MNF hnuaia Block OB leh Frontal leh Unit hrang hrang hruaitute chuan nimin khan Thenzawl Bazar Veng-a Vantawng Group YMA Run-ah Joint Meeting neiin he hun hmanpuitu MNF General Hqrs.-a Adviser J. Malsawmzuala Vanchhawng chuan harsatna hrang hrang karah Zoramthanga kaihhruai Sawrkar chuan theihtawp chhuahin hma a la tih tarlangin, kumin inthlan ah pawh sawrkar an siam leh ngei tur thu a sawi.

Electoral Roll siam thar tlangzarh niin Serchhip District-ah Vote nei thei 53,807 an awm

Image
Kumin January ni 1-a kum 18 tling chin te laa Electoral Roll siamthat hna chu zawhfel niin nimin khan tlangzarh a ni ta a. Serchhip District-a Assembly bial 3-ah vote nei 53,807 an awm a. Heng zinga 419 chu Service Voters niin vote nei zinga 27,458 chu Hmeichhia leh 25,933 chu Mipa an ni.

Bialtu MLA leh District Bawrhsap ten LFCS Serchhip Cultural Day an hmanpui

Image
Serchhip-a Little Flower Convent School chuan nimin khan Serchhip Sports Stadium-ah ‘Cultural Day, 2023’ hmangin he hun hi Serchhip bialtu MLA Lalduhoma leh Serchhip District Bawrhsap Nazuk Kumar IAS te chuan an hmanpui a ni.

Aizawl-a phochhuah turin Serthlum vailiam a ni

Image
Serchhip District chhung East Lungdar atanga Serthlum tharchhuah te chu Aizawl-ah zawrh turin nimin zing khan Serchhip atangin District Bawrhsap Nazuk Kumar IAS chuan a vailiam.

IPRO te nen inkawmna nei

Indian Institute of Mass Communication (IIMC) North East Regional Campus, Mizo-ram University, Tanhril-a ‘Short Term Course for Officers & Media Persons’ rawn nei Sikkim atanga lo kal I&PR Officer 5 leh Journalist 15 te leh Mizoram Information Service Officer 3 te chuan nimin khan MZU Guest House, Tanhril-ah inkawmna hun an nei a, Journalist te hmasawnna tur leh Public Relations pawimawhna hrang hrangte an sawiho a ni.

India-a bomb thlak dem

Myanmar ram Thlawhtheihna ten India ramchhung a Bomb an thlak chu NGO Co-Ordination Committee chuan an dem thu sawiin, hma la turin India sawrkar an phut thu an sawi.

Tourism Minister in hmanpui

Tuivai leh Tuiruang infinna hmuna ni thum awh tur Inpumkhatna Kutpui, Ruonglevaisuo Unau Suopui Kut 2023 hman mek chu nimin khan Tourism Minister Robert Romawia Royte chuan a hmanpui a, Assam, Mizoram, Manipur leh Tripura-a Zo chi peng hrang hrang an tel a ni.

Glue Trap hman khapna siam

Kolasib District Bawrhsap chuan Sazu manna thang chi khat, Glue Trap hman a khap a. Hetiang thang hian buh leh thlaite humhalh tha hle mah se, rannung dang tam tak a tihhlum tel theih avangin an District huamchhungah hman a khap a nih thu a tarlang a ni.

MADC Dy. Chairman paih

Nimin-a Mara Autonomous District Council thutkhawm neih ah MADC Deputy Chairman nilai M. Manasia  paih duhna Motion lutin Deputy Chairman nilai duh lo lam vote a tam zawk avangin Deputy Chairman hi paihthlak a ni.

Mizoram-ah Vote nei thei 8,42,388 awm mek

Image
Kumin January 1-a kum 18 tling chin te laa Electoral Roll ennawn hna thawh chu zawhfel niin Mizoram pumah vote nei thei 8,42,388 an awm.

Oil Depot siam turin thlen

Mizoram Rajya Sabha MP K. Vanlalvena chuan nimin khan Union Secretary of Petroleum and Natural Gas Pankaj Jain IAS chu a Pisa-ah a kawmin Mizoram chhung hmun pahnih, Bairabi leh Sihhmui-ah te Oil Depot siam turin a ngen a. Mizoram chu tlangram a nih avang leh Fur ruahtui tlak tamna ram a nih avangte in Monsoon Period-ah Oil harsatna kan tawh fo thu te, Meghalaya tlang ram leh North Cachar Hills Area-ah National Highway leh rel kawng a that loh apiangin Mizoram-a Oil phurtu tanker ten harsatna an tawh ziah thu te sawiin, Thal laia Petrol leh Diesel chhekkhawlna tur Mizo-ram-ah din thuai a tul thu leh Rail Station awmna Bairabi leh kum 2025-a Rail Station ni mai tawh tur Sihhmui chu hmun remchang leh tha ber nia a hriat thu te a thlen bawk a ni.

Khapna thlirletna neih a ni

Nimin khan Home Minister Lalchamliana hovin Aizawl-a SAD Conference Hall-ah kum 2022 Krismas leh kumthar laia halpuah leh hal-mawi chi hrang hrang khapna thlirletna neih a ni a, he hunah hian kum 2022 Krismas bawr velah chuan halpuah leh halmawi te hi puak lo ang a nih thu leh kum thar-ah erawh minute 35 vel chhum lo chat lova hal a nih thu tarlan niin District dang zawng aiin Aizawl District-ah halpuah ri leh man a tam thu tarlan a ni. He hunah hian Home Minister chuan Sawrkar phalloh thil zuar leh leitute chuan an rilru put hmang thlak se tiin, khapna bawhchhiaa hal leh zuar nih hi thil zahthlakah ngaia inzirtirna pawh uar lehzual a kalpui a, kum lokal leh turah mipui zirtirna uar lehzual a kalpui nise a ti a ni.

Lunglei Municipal Council Office Dy. CM in hawng

UD&PA Department changtu Deputy Chief Minister Tawnluia chuan nimin khan Lunglei Municipal Council (LMC) Office chu Lunglei ah a hawng.

Serchhip District-ah kum 2021 aiin 2022-ah Malaria hrik pai leh nunna chan an tlem zawk

Image
Nikum (2022) chhung khan Serchhip District-ah Malaria hrik pai mi 28 hmuh niin Malaria vanga nunna chan mi pakhat an awm a. Kum hmasa (2021) aiin Malaria hian ziaawm lam panin nikum hmasa aiin Malaria hrik pai hmuhchhuah leh nunna chan hi nikum khan an tlem zawk a ni.

Serchhip DIPRO in MJA te kumthar thingpui inpui

Image
Information & Public Relation Department a Deputy Director leh Serchhip-a DIPRO K. Saitluanga chuan nimin khan MJA Serchhip District Member te kumthar thingpui inpui ah sawmin a pisa-ah inkawm hona hun an hmang.

Thla khat chhung COVID-19 kai hmuh belh awm lo

Image
Nikum December 12 hnu lamah Serchhip District-ah COVID-19 hri kai hmuh belh an awm tawh rih lo a, thla khat chhung zet COVID-19 hri kai hmuhchhuah an awm tawh lo a ni.

Lungawi lohna ngaihtuah

Image
Serchhip District chhunga National Highway No. 54 laihzauh hna thawh meka ram lak chungchanga sawiselna (Objection) lutte ngaihtuahna hun (hearing) chu nimin khan Competent Authority for Land Acquisition (CALA) leh Deputy Commissioner Nazuk Kumar IAS Pisa-ah neih a ni a, he hunah hian Keitum khua atanga sawiselna (objection) thehlut mimal leh pawl pakhat ve ve thu thehluhte ngaihtuah niin Addl. DC Lalmuansanga Ralte leh SDO (S) Lalzikpuii te pawh he hunah hian an tel a ni.

National Youth Day hmang

Nehru Yuva Kendra (NYK) Lawngtlai huaihawtin nimin khan National Youth Day vawi 39-na chu Lawngtlai-ah hman a ni a, he hun hi Lawngtlai DIPRO C. Lalhruaitluanga chuan khuallian nia hmanpuiin thalai kalkhawmte fuihna thu a sawi a ni. Sakhaw puithiam, Philosopher leh ram zalenna sual laia mipui rilru a ram hmangaihna tuh kawnga thawh hlawk tak, Swami Vivekananda pian ni January ni 12 hi India Sawrkar chuan National Youth Day-ah puangin, kum 1985 atang khan hman thin a ni.

Raltlan te tan In sak sak

Lawngtlai District-a Hmawngbu khawtlang chuan Bangladesh atanga an sahimna zawnga an khua a tlanlutte chenna tur In an sak sak mek a, Hmawngbu khua ah hian raltlân chungkua 20, mi 59 awm mekin khawtlang hian In 17 sak phawt an tum a, tunah hian In 14 sa zo tawhin khawtual miten an nghei a nih loh chuan chhuan-chham a an awm an remtih loh thu an sawi bawk.

Health Clinic Centre hawng

Nimin khan Lengteng bialtu MLA Dr. L. Thangmawia chuan a bial chhung Puilo khua ah Health Clinic Centre building sak thar chu a hawng a, he building hi Puilo-a Camp nei mek, DBL Company Pvt. Ltd. ten CSR Fund cheng nuai 6 an pek hmanga sak niin Health Worker pakhat leh Staff pakhat dah nghal a ni bawk. He hunah hian Dr. L. Thangmawia chuan Leng-teng bial chhunga khua zawng zawngah Health Sub/Clinic Centre a lo awm kim ta tih sawiin, Puilo khawtlang pawh he Centre ti changtlung tura an tih theih apiang ti tur leh thawktute tha taka lo thawhpui turin khawtlang mipuite a chah nghal bawk.