Lunglei Municipal Council Office Dy. CM in hawng

UD&PA Department changtu Deputy Chief Minister Tawnluia chuan nimin khan Lunglei Municipal Council (LMC) Office chu Lunglei ah a hawng.

Convention Centre Basement-II a LMC Office hawnna hunah hian Deputy Chief Minister chuan MNF Party in kum 2018 inthlanpui dawna Manifesto an neih zinga mi, thuneihna semzai tihpuitlin nana pakhat LMC hlenchhuah a ni ta chu lawmawm tih thu sawiin, LMC chu thuneihna pawimawh tak tak nei a nih thu a sawi a. “Khawpui tihhmasawnna tura Sawrkar laipui a Urban Ministry in ruahmanna a siam leh sum leh pai a pekchhuah thin dawhthleng chu Municipal a ni a, Village Council ringawta kal chuan sum awm mah se a dawhthleng a awm si loh chuan angaihna a awm lo,” tiin tunhmaa awm ngailo LMC Office-ah Officer leh thawktu thahnem tak an awm thar ringawt pawh Lunglei tan thil hlu tak a ni tih a sawi bawk.

Deputy Chief Minister chuan LMC chu inthlan phawt tur a nih laiin a hun erawh sawi mai theih a la niloh thu leh Assembly Session neih zawh lam, March thla chawhnu lam beisei a nih thu a sawi bawk.

He hunah hian UD&PA Department Director H. Lianzela chuan report pein LMC chuan Lunglei khawpui chhung VC 24 a huam tur thu leh Ward 11-ah then a nih thu leh Voters 40,541 an awm thu a sawi a. Tuna VC nilai mekte chu Local Council-a thlak turin Mizoram Sawrkar chuan nikum August thla khan a lo remtih tawh thu a tarlang bawk. LMC atan hian Sawrkar kum kallai ah cheng nuai 80 dah niin kum 2022- 2023 atan pawh cheng nuai 80 bawk dah leh a nih thu sawiin, LMC Office hi nikum November ni 9 atang khan Chief Executive Officer hovin thawktuten an luahlut tawh a ni.