Electoral Roll siam thar tlangzarh niin Serchhip District-ah Vote nei thei 53,807 an awm

Kumin January ni 1-a kum 18 tling chin te laa Electoral Roll siamthat hna chu zawhfel niin nimin khan tlangzarh a ni ta a. Serchhip District-a Assembly bial 3-ah vote nei 53,807 an awm a. Heng zinga 419 chu Service Voters niin vote nei zinga 27,458 chu Hmeichhia leh 25,933 chu Mipa an ni.

Serchhip District chhung Assembly bial pathum-a Electoral Roll siam thar tlangzarhna hun nimin chawhnu-a Serchhip DC Meeting Hall-a neih ah District Bawrhsap Nazuk Kumar IAS chuan Serchhip District-a Electoral Roll siam thar dinhmun tlangpui tarlangin, Serchhip District chhunga Assembly bial pathum-ah Polling Station 88 awmin Vote nei zawng zawngte hian Electors Photo Identification Card (EPIC) an neih vek thu a sawi a. Electoral Roll dik leh felfai neih a nih theih nana thawktu khaw tin-a Booth Level Officer (BLO) leh Political Party aiawhte leh Village Councils memberte chungah lawmthu a sawi a. “Tha taka kan ERO leh AERO te in lo thawhpui avangin Final Roll thianghlim leh felfai tak kan tlangzarh thei a ni,” a ti a. Engemaw thil fel lo leh siamthat ngai an neih apiangte hrilh hre thin tura chahin Political Party hrang hrang aiawh te hnenah Electoral Roll thar chu a hlan nghal a ni.

He hunah hian Serchhip Election Officer Lalrinchhani Ralte pawhin Election Department hmalakna ah te a thawhpui that thin avangin Political Party, tlawmngai pawl leh khawtlang hruaitute chungah lawmthu a sawi a. An hmalakna leh hnathawh hrang hrangah Political Party te an mamawh thin tih sawiin, kumin hi inthlanpui neih kum a nih avangin kumdang zawng aia an thawhpuina an mamawh lehzual dawn thu sawiin, tha taka thawhpui zel turin a sawm a. Electoral Roll-ah ramdang mi thun an nih lohna tura YMA te hmalak thinna ah pawh lawmthu a sawi bawk.

Kumin January ni 1-a kum 18 tling chin te laa Electoral Roll siamthat hna thawh tur atan hian nikum November 9 khan Draft Electoral Roll tharchhuah niin hemi atang hian buaipui ngai te buaipui nghal a ni a. Draft Electoral Roll tarchhuah ah khan Serchhip District pumah Vote nei 52,907 awmin Electoral Roll tarchhuah takah hian General Voters 53,388 awmin vote nei punna hi 481 a ni a. Draft Roll-a hming lang mi 1012 paih niin heng te hi mitthi 514, Pem leh insawn mi 418 leh hming lo awm nawn 80 te an ni.

Final Electoral Roll tlangzarh takah hian siamthat ngai leh sawisel duh neite tan siam that zui theih a ni dawn a, hei bakah hian kumin hi Assembly inthlanpui neih kum a nih avangin Dan pangngai angin inthlanpui neih hmain Electoral Roll ennawn hnaa hi thawh leh a ni dawn bawk a ni.