Serchhip District-ah kum 2021 aiin 2022-ah Malaria hrik pai leh nunna chan an tlem zawk
Serchhip CMO Office atanga thu kan dawn danin nikum January thla atanga December thla thleng khan Serchhip District chhunga thisen enfiah 28,919 awmin heng atang hian Malaria hri kai mi 28 hmuhchhuah an ni a, nikum chhunga Serchhip District-a Malaria hrik pai hmuhchhuah mi 28 zingah hian Malaria PV leh PF mi 14 ve ve an awm a, mihring cheng zat atang chhutin mihring sang khat zela 0.37 ten Malaria hrik pai ang an ni. Nikum hmasa (2021) chhung khan Serchhip District-ah hian Malaria hrik pai mi 45 lai hmuhchhuah niin kum hmasa aiin za zela 37.78 in Malaria hrik pai hmuhchhuah hi an tlem zawk a, nikum hmasa ah Malaria vanga thi mi pahnih awmin nikum-ah mi pakhat a thi leh a, nikum-a Malaria vanga thi hi Thentlang khaw mi a ni.
Nikum chhunga Serchhip District-a Malaria hrik pai hmuhchhuah zingah hian Thenzawl CHC huamchhunga hmuhchhuah mi 11 zet awmin Thenzawl CHC huamchhungah hian nikum hmasa khan mi 11 zet hmuhchhuah a lo ni tawh bawk a, Serchhip Centre hnuaiah Malaria hrik pai mi 6 hmuh niin East Lungdar PHC hnuaiah 4, Khawlailung PHC, Ngentiang PHC leh Chhingchhip PHC hnuaiah mi 2 theuh leh North Vanlaiphai CHC hnuaiah Malaria hrik pai mi pakhat ve hmuh an ni bawk.
Serchhip CMO Office-a thawkte chuan Malaria laka mipuite an inven theihna tur hian kawng hrang hranga hmalaa inzirtirna neih a nih thu sawiin, nikum January thla atanga December thla thleng khan District chhunga zirna In hrang hrangah tum 67 zet zirtirna pek a nih thu an sawi a, aurinna hmangin tum 128 zet inzirtirna neiin NGO hrang hrangte nen tum 13 lai Malaria chungchang inzirtirna hi an neih thu an sawi a. Hei bakah hian ram-a riak thin te pawh tum 12 lai an ram riahna hmunah an tlawh thu sawiin, ASHA ten In tlawhchhuah te neiin Chanchinbu leh thildang hmanga inzirtirna te neih a nih thu an sawi bawk.
Comments
Post a Comment